رەمەزان حەسەن: ب دەستڤە ئینانا رێزا سێیێ ل ئیراقێ دەستپێكە بۆ ئەنجامێن باشتر
تیما خوەلێگدانا یانەیا زاخۆ یا لاوان شیان خەلاتێ زیڤی ل سەر ئاستێ قارەمانییا ئیراقێ بۆ لاوان ب دەستڤە بینن پشتی شیایین ب كۆمكرنا 90 خالان رێزا سێیێ بهێت، یانەیا ئەلجامعە 210 خالان بوو خودانا ناسناڤی و ئەعزەمییە ب176 خالان رێزا دویێ هاتن، ژ چارچووڤێ قارەمانیێ دا ئەوا ل ئەینییا بۆری ب پشكدارییا زێدەتری 250 یاریزانان ژ 24 یانەیێن ئیراقێ و كوردستانێ ل باژێرێ بەغدا هاتییە كرن.
رەمەزان حەسەن راهێنەرێ نێڤدەولەتی و هەلبژارتیێ ئیراقێ و سەرپەرشتێ تیما یانەیا زاخۆ بۆ رۆژنامەیا ئەڤرۆ گۆت: پشكدارییا ئەڤچارە ژبلی كو ب نفشەكێ نوو یێن یاریزانێن د ژیێ بچووك دا، لێ بەرهەمەكێ باش ژی بۆ وەرزشا زاخۆ هاتییە پێش ئەوێن بۆ جارا ئێكێ یە ل سەر ئاستێ لاوان بۆ خوەلێگدانا ئازاد پشكداری كرین و ئەڤ ئەنجامێن خوارێ دەستڤە ئیناین ئەو ژی، دلۆڤان سلێمان بۆ كێشا 57كگم، كەرەم مەحمۆد بۆ كێشا 74كگم، ئەكرەم محەمەد بۆ كێشا 74كگم هەر ئێك ل سەر كێشا خوە رێزا سێیێ هاتن، سالح سەباح بۆ كێشا 57كگم، سەعید سەباح بۆ كێشا 61كگم ، قەیسەر مەحمۆد بۆ كێشا 66كگم، سالار عەلی بۆ كێشا 125كگم رێزێن چارێ هاتن، رۆژهات رەمەزان حەسەن بۆ كێشا 125كگم رێزا پێنجێ هات.
هەروەسان ناڤهاتی سۆپاسییا كارگێرییا یانەیا زاخۆ كر ئەوێن بەردەوام پشتەڤانییا دارایی و مەعنەوی ل تیما وان دكەت و گۆت: قارەمانیەكا جودا بوویە ژ قارەمانیێن دی ژبەر كو مە ب نفشەكێ نوو و هیڤیێن مەزن و وەرگرتنا مفایی و شارەزاهیی دێ پشكداربووینە بوو مە دیاربوو كو دێ بنیاتەكێ بهێز بۆ وەرزشا زاخۆ هێتە بەرهەمئینان.
