ل ناوچەداریا خانكێ 31 جاددە دهێنە قێركرن
دهوك، لەزگین جوقی:
رێڤەبەرێ ناوچەداریا خانكێ دیار كر، كابینا نەهێ یا حوكمەتا هەرێما كوردستانێ گرنگیەكا مەزن دایە ناوچەداریا خانكێ و دبێژیت: نوكە هەژمارەكا پڕۆژەیێن خزمەتگوزاری ل دەڤەرێ د وارێ بجهئینانێ دانە.
زەردەشت شێخ شامۆ، رێڤەبەرێ ناوچەداریا خانكێ بۆ رۆژناما ئەڤرۆ راگەهاند، نوكە پتر پڕۆژەیێن جاددە و سۆلینێن ئاڤڕێژ ل ناوچەداریا خانكێ دهێنە چێكرن و گۆت: «ل ناوچەداریا خانكێ 31 جاددە ب گوژمێ پتری ملیارەك و 400 ملیۆن دیناران دهێنە بجهئینان، هەروەسا جاددەیا سەرەكی یا خانكێ ب گوژمێ 745 ملیۆن دیناران هاتیە چێكرن، ئەڤ جاددە هاتیە ڤەكرن و كەفتیە د خزمەتا خەلكێ دا دەڤەرێ و شۆفێران دا».
ناڤهاتی گۆتژی: «پڕۆژەیێن چێكرنا جاددە و سۆلینێن ئاڤڕێژ ل سەر هەمی تاخێن خانكێ هاتینە بەلاڤكرن و ل هەمی تاخان دهێنە چێكرن بۆ پتر خزمەتكرنا وەلاتیان، ئەم بەردەوام كار ل سەر بجهئینانا پڕۆژەیان و چێكرنا جاددەیان دكەین».
