پێنج مزگەفت ل دەڤەرێن كوردستانی دێ هێنە ئاڤاكرن
ئەڤرۆ، سالار محەمەد دۆسكی:
ئەندامەكا پەرلەمانێ ئیراقێ ژ فراكسیۆنا پارتی دیموكراتی كوردستان ئاشكرا كر كو رازیبوونا ئاڤاكرنا پێنج مزگەفتان وەرگرتیە و ئەڤ سالە دەست ب ئاڤاكرنا وان ل دەڤەرێن كوردستانی یێن دەرڤەی ئیدارەیا هەرێما كوردستانێ دێ هێتە كرن.
كاڤین شێخ سەعید، ئەنداما پەرلەمانێ ئیراقێ ژ فراكسیۆنا پارتی دیموكراتی كوردستان بۆ رۆژناما ئەڤرۆ دیار كر، وێ سەرەدانا سەرۆكێ دیوانا وەقفا سوننی كریە و مەرەم ژ سەرەدانێ ئەو بوویە، كو پێنج مزگەفت ل دەڤەرێن كوردستانی یێن دەرڤەی ئیدارەیا هەرێما كوردستانێ بهێنە ئاڤاكرن و گۆت: «ئەم شیاین رازیبوونێ ل سەر ئاڤاكرنا وان مزگەفتان ب دەستخوەڤە بینین، هەر پێنج جهێن مە پێشنیاركرین بۆ ئاڤاكرنا مزگەفتان ل دەڤەرێن (فەیدیێ، شێخان، تلكێپ، وان و باشیكێ) رازیبوون ل سەر هاتیە كرن و خودێ حوز بكەت، ئە سالە دەست ب ئاڤاكرنا وان دێ هێتە كرن».
كاڤین شێخ سەعید گۆتژی: «پشتی مە سەرەدانا ئەڤان دەڤەران كرین، ل دووڤ خواست و داخوازیێن خەلكێ مە بوویە، مە داخوازا خەلكێ خوە ب ئەمانەت گەهاند و رازیبوون ل سەر ئاڤاكرنا وان هاتە كرن، بڕیارە ئەو پێنج مزگەفتە ل سەر ئێك ستاندارد بهێنە ئاڤاكرن، ل دووڤ داخوازا مە چوونە د ناڤا پلانێ دا و بڕیار ل سەر ئاڤاكرنا وان هاتەدان و ل ناڤەراستا مەها دووماهیا ئەڤ سالە دەست ب ئاڤاكرنا وان دێ هێتە كرن».
