سەنتەرێن ئۆتیزمێ ل هەموو دەڤەرداریان دێ هێنە ڤەكرن
وەزارەتا كار و كاروبارێن جڤاكی ل حوكمەتا هەرێما كوردستانێ ئاشكرا كر، ل دووڤ پلانەكا وەزارەتێ و ژ پێخەمەت خزمەتكرنا وەلاتیان و زارۆیێن تووشی ئۆتیزمێ بووین، سەنتەرێن ڕاهێنانا زارۆیێن ئۆتیزمێ یێن حكومی ل هەموو دەڤەرداریان دێ هێنە ڤەكرن و ئەو سەنتەرێن حكومی بێ بەرامبەر دێ وان زارۆیان وەرگرن یێن تووشی ئوتیزمێ بووین.
ئاریان ئەحمەد، پەیڤدارێ وەزارەتا كار و كاروبارێن جڤاكی دیار كر، ل هەرێما كوردستانێ هەژمارەكا زۆرا زارۆیان تووشی ئۆتیزمێ بووینە و وان پێدڤی ب چاڤدێری و ڕاهێنانێن تایبەت هەیە، گەلەك جاران ژ ئەگەرێ هندێ، كو دایك و بابێن وان زارۆیان فەرمانبەرن، ئەركێ ل سەر ملێن وان یێ گرانە، لەوما دەڤێت ب پارە وان ببەنە سەنتەرێن ئەهلی.
زەكیا سەید سالح، بریكارا وەزارەتا كار و كاروبارێن جڤاكی ل حوكمەتا هەرێما كوردستانێ دیار كر، د پلانا وەزارەتا وان دایە، كو سەنتەرێن ڕاهێنانێ یێن حكومی بۆ زارۆیێن ئۆتیزمێ ل هەموو دەڤەرداریان بهێنە ڤەكرن، نوكە ئەو سەنتەرە ل چەندین دەڤەرداریان هەنە و بڕیارە ئەو سەنتەرە ل هەموو دەڤەرداریێن هەرێما كوردستانێ بهێنە ڤەكرن.
