هەژمارەكا پڕۆژەیێن خزمەتگوزاری ل ناوچەداریا چەمانكێ دهێنە بجهئینان
ئامێدیێ، مەحمود نهێلی:
د بەردەوامیا چێكرنا پڕۆژەیێن خزەتگوزاری دا ل دەڤەرێ و گەهاندنا جاددەیان، دەست ب چێكرنا چەندین پڕۆژەیێن خزمەتگوزاری ل سنوورێ ناوچەداریا چەمانكێ هاتیە كرن، ژ وان ژی: پڕۆژەیێ چێكرنا رێكا جۆتسایدێ ناوچەداریێ.
ئیسماعیل حەمید، رێڤەبەرێ ناوچەداریا چەمانكێ بۆ رۆژناما ئەڤرۆ دیار كر، نوكە هەژمارەكا پڕۆژەیێن خزمەتگوزاری ل دەڤەرێ دهێنە بجهئینان، ژ وان پڕۆژەیان ژی: چێكرنا جۆتسایدێ سەنتەرێ ناوچەداریا چەمانكێ یە، كو ئێكە ژ پڕۆژەیێن هەرە گرنگ ل دەڤەرێ و گوت: «پڕۆژەیێ جۆتسایدێ سەنتەرێ ناوچەداریا چەمانكێ ب درێژاهیا كیلۆمەترەكێ دهێتە بجهئینان و پڕۆژەیەكێ باش و سەردەمیانەیە و هەموو پێدڤیاتێن جۆتسیادیێ تێدا هەنە».
ناڤهاتی دیار ژی كر، بۆ بجهئینانا ڤی پڕۆژەی گوژمێ پتر ژ دو ملیار دیناران هاتینە تەرخانكرن و نوكە دۆرێن 50% پڕۆژە هاتیە بجهئینان و گۆت: «هەر چەندە دەمێ پڕۆژەی 400 رۆژن، لێ دێ بزاڤان كەین بەری دەمێ خوە یێ دیار كری ب داوی بهێت و بكەڤیتە د خزمەتا وەلاتیان دا».
گۆتژی: «بڕیارە دەورۆبەرێن جاددەیێ بهێنە چێكرن و ببنە دكان و پاركێن مودێرن و جهـ بۆ هاتیە دەستنیشانكرن و ب تمامبوونا وێ دێ دیمەنەكێ جوان دەتە سیمایێ باژێری، دیسا د بەرنامێ مە دایە چەندین پڕۆژەیێن دیترێن خزمەتگوزاری ل ناوچەداریا چەمانكێ بهێنە بجهئیان، مینا: پڕۆژەیێن جاددەیێن ناڤخوەیی و دەرڤە و پڕۆژەیێن ئاڤ و كارەبێ».
