یانەیێن كوردستانی د گەڕا چارێ دا سەركەفتی نەبوون
هەرچار یانەیێن كوردستانێ د خولا ئیراقێ دا دهۆك، زاخۆ، هەولێر و نەورۆز نەشیان سەركەفتنێ د گەڕا چارێ یا هەڤڕكیێن قۆناغا ئێكێ ژ چارچووڤێ خولا ستێرێن ئیراقێ یا تەپا پێی ب دەستڤە بینن، دو یانە ب خالەكێ و دو یێن دی ب خوسارەتی ئەڤ گەڕە دەربازكرن.
دهۆك ب خالەكێ ڤەگەڕیا
تیما یانەیا ب خالەكێ ژ باژێرێ نەجەف ڤەگەڕیا پشتی بێ گۆل دگەل خودانێن ئەردی یانەیا نەفت ئەلوەسەت وەكهەڤ دەركەفتی، دڤێ یاریێ دا ئەو ئاستێ چاڤەڕێ كری ژلایێ یاریزانان ڤە نە هاتە دیت سەربارەیی ژ دەستدانا چەند دەلیڤەیێن گۆلكرنێ، د بەرانبەر دا تیما مێڤان ل بن گڤاشتێن جەماوەرێ خوە بوو بزاڤێن مەزن دكرن پێخەمەت دەستڤە ئینانا خالێن یاریێ، لێ ئەنجام بێ گۆل وەكهەڤبوو، ل دۆر ڤێ یاریێ سلێمان رەمەزان راهێنەرێ دهۆكێ گۆت: یاریزانێن مە چەند دەلیڤەیێن گۆلكرنێ ژ دەستدان و نێزیكی گۆلا نەفت ئەلوەسەت بوو، لێ مفا ژ دەلیڤا نە هاتە وەرگرتن و تیما مە یاریەكا باش ئەنجامدا هەروەسان كاریگەرییا سترێسیێ ل سەرجەستەیا یاریزان یا دیاربوو و راوەستییانا خولێ دێ بزاڤێ كەین بۆ ڤەگەرییا چالاكیی و جەستەییا یاریزانان، ئەم هاتبووینە نەجەف بۆ دەستڤە ئینانا سێ خالان، لێ خالەك دناڤ یاریگەهـ و جەماوەرێ هەڤڕك دا خراب نینە.
زاخۆ بەردەوامە ژ دەستدانا خالان
ژلایێ خوەڤە تیما یانەیا زاخۆ نەشیا جەماوەرێ خوە كەیفخوەش بكەت ب سەركەفتنێ پشتی دگەل مێڤانا خوە یانەیا تەلەبە یا بەغدایی بێ گۆل وەكهەڤبوون، د یارییا واندا ئەوا ل ئەینییا بۆری ل یاریگەها زاخۆ یا نێڤدەولەتی هاتییە كرن، دڤێ یاریێ دا تیما دویێ یا كوردستانێ ژی بەردەوامی دا ئەنجامێن وەكهەڤی، عەلی كازم گۆلپارێزێ یانەیا زاخۆ دیاركر تیما وان ئاستەكێ مەزن نیشان دا و گڤاشتنێن بەردەوام ل سەر گۆلا تەلەبە كرن و كۆمەكا دەلیڤەیێن گۆلكرنێ ژ دەستدان، بێ چەنسی د تۆماركرنا گۆلێ دا مە هەبوو، لێدانێن ئێكسەر یێن فاولێ، كۆرنەر و هێرێن هەمی لایەكی ڤە، ل دووماهیێ نە گەهشتینە ئەوێ ئارمانجا مە دڤیایی كو سەركەفتن بوو، ب ئانەهییا خودێ بۆ یاریێن بهێت دێ قەرەبووكەین.
هەولێر خوسارەت بوو و نەورۆز وەكهەڤی ئینا
ژ دەرڤەیی یاریگەها خوە یانەیا هەولێر ب دو گۆلان بەرانبەر گۆلەكێ دگەل یانەیا شورتە یا بەغدایی تووشی خوسارەتیێ بوو، ژلایێ خوەڤە یانەیا نەورۆز ل یاریگەها سلێمانیێ دگەل یانەیا مینا بێ گۆل یارییا خوە ب دووماهی ئینا، بڤێ چەندێ هەرچار یانەیێن كوردستانی د خولا ستێرێن ئیراقێ دا نەشیان چو سەركەفتنان بینن.
بڤان ئەنجامان، تیما یانەیا دهۆك جهێ خوە ل رێزا سێیێ پاراست ب هەشت خالان، زاخۆ ژ یێ وەكهەڤییان ب سێ خالان ل رێزا 17ێ دهێت، ب چار خالان هەر ئێك ژ هەولێر و نەورۆز بەروەخت ل رێزێن 12ێ و 14ێ دهێن، ئەوا یانەیا شورتە ب نەهـ خالان سەرێ لیستێ دهێت، ب كێمترییا گۆلان جەوییە ل رێزا دویێ دهێت.
