بزاڤ بۆ دوورئێخستنا رەعد حەمۆدی دهێتە كرن
قەیس وەیس:
ئەندامێ كۆمەلا گشتی یا لژنەیا ئۆلمپییا ئیراقێ خالد كبیان نڤێسارەكا فەرمی ژبۆ دوورئێخستنا سەرۆكێ لژنەیا ئۆلمپی رەعەد حەمۆدی پێشكێشی دەستەكا گشتی كرییە.
ناڤهاتی بۆ دەزگەهێن راگەهاندنێ گۆت: نڤێسارا فەرمی ژبۆ دوورئێخستنا رەعەد حەمۆدی هاتییە هنارتن بۆ كۆمەلا گشتی یا لژنەیا ئۆلمپی پێخەمەت دەنگدان بۆ بهێتە كرن د دەمێ كۆمبوونا نە ئاسایی یا دەستەكا گشتی ئەوا دێ ل پێنجێ كانوونا بهێت ل پایتەختێ ئیراقێ بەغدا هێتە كرن.
خالد كبیان گۆت: داخوازییا مە یا شەرعی یە ژبەركو ل دووڤ چەند بەندێن یاسایا لژنەیا ئۆلمپییا ئیراقێ یا هژمارە 29 ل سالا 2019ێ، سیستەمێ نافخۆ هژمارە ئێك یا سالا 2020 وگوهۆڕینێن وێ، مە چەند سەرپێچیێن یاسایی، كارگێری و دارایی ئەوێن سەرۆكێ لژنەیێ د ماوەیێ دو سالێن بۆری دا كرین، مە پەیوەندی ب لژنەیا ئۆلمپی پشكا پەیوەندییان كریینە ئەوێن رازیبوون ل سەر ئەڤێ داخوازنامێ.
هەروەسان ناڤهاتی دیار كر پرانییا ئەندامێن لژنەیا گشتی ل سەر داخوازیێ رازینە كو رەعەد حەمۆدی بهێتە دوورئێخستن و ئەو دەمێ درێژ یێ برێڤەبرنا كاری كو رێز ل یاسایی و سیستەم و رێنمایێن نافخۆ یێن لژنەیا ئۆلمپی نە كرییە و ئەندامێن لژنەیا جێبەجێكرنێ پشتگوهـ هاڤێتینە و گۆت: قۆناغا پشتی چوونا حەمۆدی دێ باوەرییا حوكمەتا ئیراقێ ب پرۆژەیێ گوهۆڕینێ بیت و وەرگرتنا پشتەڤانییا دارایی و لۆجستی و هەڤكاریێ ژبۆ ئاڤاكرنا باوەریێ دگەل هەمی وەزارەت و دەزگەهێن حوكمەتێ پێخەمەت ڤەگەڕاندنا وەرزشا ئیراقێ بۆ جهێ خوە یێ دروست.
