زاخۆ ب پشتگەرمییا جەماوەرێ خوە چاڤ ل سەركەفتنێ یە
چاڤەڕێ دهێتە كرن ئەڤرۆ ل دەمژمێر پێنجێ ئێڤاری تیما باسكێت بۆلا یانەیا زاخۆ د ناڤ ئەرد و جەماوەرێ خوە دا دێ یانەیا دیفاع ئەلجەوی یا بەغدایی مێڤان كەت ژ چارچووڤەیێ هەڤڕكیێن گەڕا هەشتێ یا خولا پلا نایابا ئیراقێ، بەری ڤێ یاریێ ل دەمژمێر دو یێ پشتی نیڤرۆ تیما تازەپێگەهشتیێن دهۆكێ دێ بەرانبەر تازەپێگەهشتیێن دیفاع ئەلجەوییە بن.
كوڕێن خابووری ئەوێن د كاودانەكێ هەستیار دا پشتی ئەنجامێن لاواز د یاریێن بۆری دا ئیناین دێ بزاڤێ كەت ب پشتگەرمییا جەماوەرێ خوە سەركەفتنان ڤەگەڕێنت و ڕادەكی بۆ ئەوان خوسارەتییان ب دانیت، ژ سەرجەمێ حەفت یاریێن بۆری دا چار خوسارەتی و سێ سەركەفتن هەبووینە، هەرچەندە د دو یاریێن دەستپێكێ دا كورێن خابووری ب هێز هاتبوونە د ناڤ خولێ دا لێ بۆ یاریێن دووڤدا ئەو ئاستێ پێدڤی ب ئەنجام ڤە نە هاتیە دیتن تایبەت ژلایێ یاریزانێن خوە یێن پیشەكار ژ وەلاتێ ئەمریكایێ تایبەت رەشاد حسێن، مایكل مەككۆل و ریتچارد چاكسۆن، ئەڤچەندە بوویە جهێ نەرازیبوونا كادرێ راهێنانێ و كارگێرییا یانەیی و جەماوەرێ وەرزشی.
ل دووڤ پێزانین دەست ب رۆژنامەیا ئەڤرۆ كەفتین دبیت یارییا ئەڤرۆ دووماهی دەلیڤە بیت بۆ یاریزانین پیشەكار هەكە ئاستێ خوە یێ راستەفینە نیشان نەدەن دوور نینە بهێنە دوورئێخستن و یێن باشتر بهێنە جهێ وان، كارگێرییا یانەیا زاخۆ ب هەمی شیانێن خوە دێ بزاڤێ كەت هێزا تیما خوە د ناڤ خولێ دا ڤەگەرینت.
