ب بەرهەڤبوونا پارێزگارێ دهۆكێ ئێكەم دیدارا ئەدەبی ل ئاكرێ هاتە سازكرن
ئاكرێ، رەمەزان زەكەریا:
ب بەرهەڤبوونا پارێزگارێ دهۆكێ و بریكارێ وەزارەتا رەوشەنبیری و جێگرێ بەرپرسێ مەكتەبا رێكخستنا پارتی ل پارێزگەها دهۆكێ و دەڤەردارێ ئاكرێ و هەژمارەكا بەرپرسێن دام و دەزگەهێن حزبی و حكومی و نڤیسەر و هونەمەرندێن دەڤەرێ دوهی 13/11/2023 بزاڤا رەوشەنبیری ل ئاكرێ ئێكەم دیدارا ئەدەبی یا ئاكرێ سازكر.
كاوە زهێر، بەرپرسێ بزاڤا رەوشەنبیری ل ئاكرێ بۆ ئەڤرۆ گۆت: «دیدارا ئاكرێ یا ئەدەبی بۆ جارا ئێكێ یە دهێتە سازكرن، بەلێ ئەڤ دیدارە دێ بیتە یا سالانە و هەر سال ژی خەلاتێ دیدارێ ب كەسایەتیەكی دێ هێتە بەخشین، ئەڤ سالە دێ خەلاتێ دیدارێ ب شەهید شاكر فەتاح هێتە بەخشین، كو خزمەتەكا زۆر پێشكێشی ئاكرێ و ئەدەبا كوردی كریە».
ناڤبری گۆت: «د دیدارا ئاكرێ دا چەندین پەنەل د بیاڤێن ئەدەبی و نڤیسین و رۆمانێ دا هاتنە گێڕان، چەندین هەلبەست و ستران هاتنە پێشكێشكرن».
د. عەلی تەتەر، پارێزگارێ دهوكێ د پەیڤەكێ دا دەستخوشی ل رێكخەرێن دیدارێ كر و گۆت: «وەك حوكمەتا هەرێما كوردستانێ ئیدارا پارێزگەها دهۆكێ ئەم پشتەڤانین بۆ هەموو دیدارێن مفادار د بیاڤێن جودا دا و مە سۆز دایە خەلكێ ئاكرێ د هەموو بیاڤان دا پشتەڤانیێ لێ بكەین».
