سێمێل و تەناهی ب هیڤیێن مەزن دێ پێنگاڤا ئێكێ هاڤێژن
قەیس وەیس:
دهێتە چاڤەڕێ كرن سوبەهی پەردە ل سەر وەرزێ نوو 2023-2024ـێ خولا پلا ئێكا كوردستانێ یا تەپا پێی ب پشكدارییا 16 یانەیێن هەرێمێ بهێتە راكرن، هەردو یانەیێن سێمێل و تەناهی نوونەرێن پارێزگەها دهۆكێ نە د خولێ دا ئەوا دێ یاریێن خوە دگەل یانەیێن هەولێرا پایتەخت ئەنجامدەن و هەمی یاری دەمژمێر دو یێ پشتی نیڤرۆ هێنە كرن.
تیما یانەیا سێمێل گەشبینە ئێكە سەركەفتن بكەتە دیاری بۆ جەماوەرێ خوە دەمێ ل یاریگەها سێیێ یا یانەیا دهۆكێ مێڤاندارییا یانەیا خاك بكەت، ل دووڤ داخویانیێن بەرپرسێن تیما سێمێلێ بۆ وەرزێ ئەڤ سالە نە بتنێ دێ پشكداربن بەلكو دێ بزاڤێ كەن شەڕی بۆ رێزێن ئێكێ بكەن و هزر بۆ دەربازبوونێ بەر ب پلا نایاب بهێتە كرن و ب پشتەڤانییا دارایی یا پارێزگارێ دهۆكێ، ئەڤ داخویانییە گەشبینی دناڤ جەماوەری دا پەیداكرییە هەروەسان ئەو گرێبەستێن لڤێ دووماهیێ هاتینە ئیمزاكرن ژ وانا ئینانا چەند یاریزانێن باش ل سەر ئاستێ كوردستانێ بەلگەیە بۆ ڤێ چەندێ.
ژلایێ خوەڤە تیما تەناهی دێ ل هەولێرا پایتەخت بیتە مێڤانا یانەیا پیشەسازی، یانەیا پارێزگەهێ بۆ سالا دویێ ل دووڤ ئێك پشت بەستن ل سەر هەمان یاریزانێن خوە یێن وەرزێ بۆری كریینە ژبلی چەند ژ یاریزانان، هەرچەندە داخویانیێن وان دیاركەن ئەو د كاودانەكێ باش دا نینن لێ وەكو یانە هەمی بزاڤ كرینە ژبۆ دەستڤەئینانا سەركەفتنان و گەشبینن ب پشتەڤانییا پارێزگارێ دهۆكێ بگەهنە ئارمانجێن خوە یێن سەركەفتنان.
ژ یاریێن دی، هەلۆ- بازیان، رۆژا ئەینی، خانەقین- سلێمانی، بابان- رزگاری، كۆیە- چەمچەمال، شۆرچە- هەلەبجەیا شەهید، قەلادۆز- رەواندۆز.
