هەكار بەرقی ئێكەم راهێنەرێ پارێزگەهێ یە لێڤل دو وەردگریت
ب فەرمی هەكار بەرقی راهێنەرێ بەرنیاس یێ تیما یانەیا سەنحاریب یا ڤۆلی بۆلێ ل سەر ئاستێ كچان وەكو ئێكەم راهێنەرێ پارێزگەها دهۆكێ باوەرنامەیا LEVEL 2 یا راهێنانێ وەربگریت، پشتی پشكداری د خولا نیڤدەولەتە دا كری ئەوا بۆ ماوەیێ پێنچ رۆژا ل هەولێرا پایتەخت ب پشكدارییا 39 راهێنەرێن ئیراقێ و كوردستانێ هاتییە كرن.
ل دۆر ڤێ یەكێ هەكار بەرقی بۆ رۆژنامەیا ئەڤرۆ گۆت: پێخوەشحالم وەكو ئێكەم راهێنەرێ یارییا ڤۆلی بۆلێ ب گەهمە باوەرنامەیا لێڤل دو یا نێڤدەولەتی كو ژلایێ فیدراسیۆنا جیهانی یا یارییا ڤۆلی بۆلێ ب هەڤكارییا فیدراسیۆنا ئیراقێ یا هەمان یاری بۆ ماوەیێ پێنج رۆژان یا بەردەوام بوو كو ژلایێ وانەبێژێ ئیرانی عەلی ئەحمەد و هاریكارییا یێ ئیراقی عەلا خەلەف ب شێوەیێ تیۆری و پراكتیكی دهاتە گۆتن و تاقیكرن ژی هاتنە ئەنجامدان و شیایین ب سەركەفتیانە ب دەستخوەڤە بینن.
هەروەسان ناڤهاتی گۆت: ئەڤ خولە ژبلی كو یا فەرمی یە و دەستڤە ئینانا لێڤل دو یا نێڤدەولەتی وەكو تاكە راهێنەرێ پارێزگەهێ شیاییم دەستڤە بینم یا گرنگتر ئەوە وەرگرتنا پێزانین گرنگ و بلند كرنا ئاستێ خوە یێ راهێنانێ ئەوا ب شێوەیێ تیۆری و پراكتیكی من وەرگرتی، پێنەڤێت ئەڤچەندە دێ بیتە پالدەرەك كو ئەز بشێم زێدەتر ئاستێ تیما فۆلی بۆلا یانەیا سەنحاریب پێشبێخم و بەرهەڤم ژی ئێك ژ كەسان بم خزمەتا وەرزشا ڤێ یاریێ ل پارێزگەها دهۆكێ بكەم.
