بۆ جارا ئێكێ كارگەهەكا گێچێ ل پارێزگەها دهۆكێ دێ هێتە دانان
لەزگین جوقی:
د چار چوڤێ گرنگیدانا كابینەیا نەهێ یا حوكمەتا هەرێما كوردستانێ ب بەرهەم و شیانێن خۆمالی و پشتی تمامكرنا رێكارێن یاسایی و كارگێڕی كارگەهەكا دروستكرنا گێجێ ل دەڤەرداریا سێمێلێ مۆهلەتا وەبەرهێنانێ وەرگرت.
فەلاح حاجی، بەرپرسێ راگەهاندنێ ل رێڤەبەریا گشتی یا وەبەرهێنانێ ل پارێزگەها دهۆكێ دیار كر، ل دووڤ نڤیسارەكێ فەرمانا مۆهلەتێ یا هەژمارە (١٢٨٠/د) كارگەها دهۆك – گێچ وەكو پڕۆژەیەكێ پیشەسازی مۆهلەتا وەبەرهێنانێ وەرگرتیە و گۆت: «پڕۆژە ب سەرمایێ 21 ملیۆن و 180 هزار و 542 هزار دۆلاران، ژ لایێ وەبەرهێنەر (كۆمپانیا زاویتە)ڤە دی هێتە بجهئینان».
گۆتژی: «پڕۆژە ل سەر رووبەرێ 50 هزار مەترێن دوجار دێ هێتە ئاڤاكرن، پڕۆژە پێك دهێت ژ كارگێڕیا پڕۆژەی، كارگەهـ، تاقیگەهـا گێچێ، جهێ تێكەلكرنا كەرەستەیان، جهێ كەرەستەیان، جهێ لێبكرنا گێچێ، جهێ داگرتن و عمباركرنا بەرهەمی، جهێ كرێكاران، یەكەیا چارەكرنا ئاڤا گران، تانكێن ئاڤێ، پاركا راوەستاندنا ترۆمبێلان و جاددە و كەسكاتی و جهێ موەلیدەیێن كارەبێ، ئەڤ پڕۆژە دكەڤیتە دەڤەرداریا سێمێلێ ل ناوچەداریا فەیدیێ».
