پارتی دێ چەندین پۆستان ل پارێزگەها نەینەوا وەرگریت
لەزگین جوقی:
بەرپرسێ دەزگەهێ هەلبژارتنێن پارتی ل مەكتەبا رێكخستنا پارتی دیموكراتی كوردستان ل پارێزگەها نەینەوا دیار كر، فراكسیۆنا پارتی ل جڤاتا پارێزگەها نەینەوا ژ بۆ خزمەتكرنا خەلكی كار دكەت و دبێژیت: پشتی هەلبژارتنان دێ پارتی چەندین پۆستان ل پارێزگەها نەینەوا وەرگریت.
سەیدۆ چەتۆ، بەرپرسێ دەزگەهێ هەلبژارتنێن پارتی ل مەكتەبا رێكخستنا پارتی دیموكراتی كوردستان ل پارێزگەها نەینەوا بۆ ئەڤرۆ گۆت: «لیستا پارتی بۆ جڤاتا پارێزگەها نەینەوا لیستا هەموو پێكهاتەیێن نەینەوایە و مە بۆ ڤان هەلبژارتنان 52 بەربژار هەنە ژ هەموو پێكهاتەیێن وێ پارێزگەهێ، هەتا نوكە هەوا پرۆپاگەندا هەلبژارتنان گەلەك ب باشی ل هەمی دەڤەران دهێتە كرن، چو ئاریشە چێنەبووینە، چو رێگری ژی نینن و هەمی بەربژار كاری خوە ئەنجام ددەن».
سەیدۆ چەتۆ گۆتژی: «پشتی هەلبژارتنان رێككەفتن ل گەل فراكسیۆنێن دیتر یێن جڤاتا پارێزگەها نەینەوا دێ هێتە كرن بۆ پێكئینانا حوكمەتا خوەجهی یا نەینەوا، پارتی ژی دێ چەندین پۆستێن گرنگ ل نەینەوا وەرگریت بۆ خزمەتكرنا وەلاتیان، بەرنامێ پارتی د دەمێ چار سالان دا ل جڤاتا نەینەوا دێ هێتە بجهئینان».
