101 سالیا دامەزراندنا ئێكەم قوتابخانە ل بامەڕنێ هاتە ساخكرن
ئامێدیێ، مەحمود نهێلی:
ل ژێر ناڤێ بامەرنێ د ناڤ 100 سالێن زانست و زانینێ دا و ل ژێر چاڤدیری و ب بەرهەڤووبوونا دكتۆر ئالان حەمە سەعید، وەزیرێ پەروەردێ یێ حوكمەتا هەرێما كوردستانێ و رێڤەبەرێ گشتی یێ پەروەردا پارێزگەها دهۆكێ و دەڤەردارێ ئامێدیێ و بەرپرسێ لقێ 18 یێ پارتی و رێڤەبەرێ پەروەردا ئامێدیێ و هەژمارەكا بەرپرسێن حكومی و حزبی و مامۆستا و قوتابی و كەسایەتیێن دەڤەرێ، دوهی 21/11/2023 ل ناوچەداریا بامەڕنێ 101 سالیا دامەزراندنا قوتابخانا بامەرنێ، كو ئێكەم قوتابخانە بوو ل وێ دەڤەرێ ل هولا ئامادەیا بامەرنێ هاتە ساخكرن و چەندین تەوەرێن جودا و پەنەل هاتنە پێشكێشكرن.
ئەڤ رێورەسمە ژ لایێ رێڤەبەیا گشتی یا پەروەردا پارێزگەها دهۆكێ و رێڤەبەریا پەروەردا ئامێدیێ ب هەڤكاری ل گەل هەژمارەكا كەسایەتیێن خوەبەخشێن بامەرنێ ڤە هاتبوو رێكخستن، زێدەباری پەیڤا وەزیرێ پەروەردێ دو سمینار ل سەر قوتابخانا بامەرنێ هاتنە پێشكێشكرن و هەژمارەكا مامۆستایێن دێرین هاتنە خەلاتكرن و چار پرتووك ل سەر بامەرنێ هاتنە ئیمزاكرن و ل سەر بەرەەڤبوویان هاتنە بەلاڤكرن.
هەروەسا پیشانگەهەكا پرتووكێن 65 نڤیسەرێن بامەرنێ هاتە ڤەكرن و پیشانگەهەكا تایبەت ب نیشادانا ب دەهان ڤەكۆلین و نامەیێن ماستەرێ و دكتۆرایێ یێن بامەرنی هاتە ڤەكرن، دیسا پیشانگەهەكا پورترێتان یێن كەسایەتیێن سیاسی و رەوشەنبیری یێن بامەرنێ هاتە ڤەكرن، زێدەباری چەندین بابەتێن دی یێن گرێدایێ ب ئاستێ زانین و زانستێ ل سەر دەمێن بەرێ ل بامەرنێ هاتنە گۆتوبێژكرن، هەروەسا پەردە ل سەر پەیكەرێن شێخ غیاسەدین نەقشبەندی و سەیدا و سیاسەتمەدار سالح یوسڤی و هەلبەستڤان ئەحمەدێ نالبەند هاتە لادان.
