وركشۆپەك ل دۆر بجهئینانا پلانا حوكمەتێ بۆ مافێن مرۆڤی هاتە ئەنجامدان
ل دهۆكێ وركشۆپەكا تایبەت ل دۆر بجهئینانا پلانا حوكمەتا هەرێما كوردستانێ بۆ مافێن مرۆڤی د ناڤبەرا سالێن 2021 هەتا 2025 دا هاتە ئەنجامدان.
ب ئامادەبوونا د. دیندار زێباری، رێكخەرێ راسپاردەیێن نێڤدەولەتی ل هەرێما كوردستانێ و چەندین نوونەرێن دام و دەزگەهێن پەیوەندیدار و رێكخراوێن جڤاكێ سڤیل یێن د بیاڤێ مافێن مرۆڤی دا كار دكەن، نڤیسینگەها رێكخەرێ راسپاردەیێن نێڤدەولەتی ل حوكمەتا هەرێما كوردستانێ ب هەڤكاریا رێكخراوا هەوارهاتنا میللی (PAO) و ب هەڤپشكی ل گەل رێكخراوا پڕۆژەیێن بچووك زاخو (ZSVP) دوهی 27/11/2023 وركشۆپەكا تایبەت ل دۆر بجهئینانا پلانا حوكمەتا هەرێما كوردستانێ بۆ مافێن مرۆڤی د ناڤبەرا سالێن 2021 هەتا 2025 دا هاتە ئەنجامدان.
د وركشۆپێ دا بەحسێ رەوشا دەڤەرێن كوردستانی یێن دەرڤەی ئیدارا هەرێما كوردستانێ و لڤینێن تیرۆرستێن داعشێ و بوردۆمانێن بەردەوام هەین هاتە كرن، د گەل دا ژی رۆلێ یونامی و چاوانیا پێشكێشكرنا خزمەتگوزاریێن سەرەكی ل وان دەڤەران و دەستپێكرنا پرۆسەیا دادپەروەری بۆ قوربانیێن جینۆسایدا، هەروەسا پلانا حوكمەتا هەرێما كوردستانێ بۆ مافێن مرۆڤی و بەرچاڤكرنا راسپاردێن تایبەت ب ئاشتەواییا نیشتمانی د چارچوڤێ پلانا هەرێمی بۆ مافێن مرۆڤی و چەندین بابەتێن گرێدای بەرنامێ وركشۆپێ هاتنە گوتوبێژكرن.
