دهۆك بەرانبەر دەلیڤەیا سەرێ لیستێ یە و زاخۆ دێ بزاڤێن سەركەفتنا دویێ كەت
چاڤەڕێ دهێتە كرن سوبەهی دەست ب یاریێن گەڕا شەشێ ژ خولا ستێرێن ئیراقێ یا تەپا پێی ب ئەنجامدانا سێ یارییان بهێنە كرن، زاخۆ و نەورۆز دێ د ناڤ ئەرد و جەماوەرێ خوە دا بن و دهۆك و هەولێر ل بەغدا دێ شەڕێ سەركەفتنێ كەن.
سوبەهی پێنج شەمبی ل یاریگەها كۆت یانەیا دهۆك دێ بیتە مێڤانا یانەیا كەرخ یا بەغدایی د یارییەكا پڕی هەڤڕكی دا ژبۆ ب دەستڤەئینانا سێ خالێن یاریێ، ئەلهۆیێن چیا ل سەر رێیەكا باش بڕێڤە دچیت، ژ پێنج یاریێن بۆری دا سێ سەركەفتن و دو وەكهەڤی هەنە بێ خوسارەتی، هەروەسان چو گۆل ل سەر نەهاتینە تۆماركرن ب 11 خالان رێزا دویێ دهێت، هەكە ب سەركەفت دێ بەروەخت هێتە سەرێ لیستا خولێ هەتا یارییا شەمبییا بهێت یا خودانا سەرێ لیستێ جەوییە ئەوا 13 خال هەین، ژلایێ خوەڤە یانەیا كەرخ پێنج خالان رێزا 13ێ دهێت، ئەڤ یارییە دێ ل دەمژمێر حەفتی شەڤ هێتە كرن.
سوبەهی ل دەمژمێر حەفتی شەڤ كوڕێن خابووری ب ژڤانن دگەل جەماوەرێ و یاریگەها خوە دا فەستیڤالەكا جوان نیشانبدەن دەمێ مێڤاندارییا یانەیا ئەلقاسم دكەت، پشتی سەركەفتنا گرنگ دگەل هەولێرێ زاخۆ ل بن گڤاشتنێن دەرۆنی دەركەفتییە هەروەكو راهێنەرێ وێ یێ قەتەری تەلال ئەلبلۆشی گۆتی ژ نوو زاخۆ هاتە دناڤ خولێ دا، ئەڤ داخوییانیە باوەری داییە جەماوەرێ وێ، كوڕێن خابووری شەش خال كۆمكرینە و رێزا 11ێ دهێت، هەكە سەركەفتنێ ئینا دوورنینە پێشڤەچوونەكا باش بینت، هەرچەندە هەتا ئاستێ تیما مێڤان یا باشە و شیایە ب حەفت خالان رێزا هەشتێ بهێت، جەماوەرێ زاخۆ چاڤەڕێ سەركەفتنا دویێ نە، ژلایێ خوەڤە سوبەهی یانەیا نەورۆز دێ ل یاریگەها خوە مێڤاندارییا یانەیا كەربلا كەت.
ژ یاریێن دی رۆژا ئەینی، یانەیا تەلەبە دێ مێڤاندارییا هەولێرا بریندار كەت، ژ یاریێن دی یێن دۆزبە، حدود- ئەمانەت بەغدا، نەفت میسان- مینا، نەفت ئەلوەسەت- نەفت ئەلبەسرا، یاریێن شەمبییا بهێت، كارەبا- جەوییە، شورتە- نەفت، نەجەف- زەورا.
هەلوەستێ خولێ بڤی شێوەیە، جەویە ب13 خالان سەرێ لیستێ دهێت، دهۆك رێزا دویێ ب11 خالان، شورتە ب10 خالان رێزا سێیێ، نەفت میسان و حدود ب هەشت خالان رێزێن چارێ و پێنجێ، هەر ئێك ژ یانەیێن نەورۆز، زەورا، ئەلقاسم و تەلەبە ب حەفت خالان رێزێن شەش بۆ نەهێ دهێن، كارەبا، زاخۆ، نەفت هەر ئێك ب شەش خالان رێزێن 10 بۆ 12ێ دهێن، كەرخ، نەفت ئەلبەسرا، كارەبا، نەجەف هەر ئێكی پێنج خال هەنە رێزێن 13ێ بۆ16ێ ل دووڤ ئێك دهێن، هەر ئێك ژ هەولێر، ئەمانەت بەغدا، مینا ب چار خالان رێزێن 17،18و 19ێ دهێن، تیما نەفت ئەلوەسەت بتنێ دو خال هەنە رێزا20ێ و دووماهیێ دهێت..
