فیدارسیۆنا تەپا پێی یا كوردستانێ بڕیار و راسپاردەیێن جودا دەركرن
د كۆمبوونا خوە یا ئاسایی دا فیدراسیۆنا تەپا پێی یا كوردستانێ چەند بڕیار و راسپاردەیێن نوو دەركرن، ئەڤچەند هات پشتی راپۆرتێن سەرپەرشتیار و دادڤانێن یاریێن گەڕا حەفتێ یا خولا پلا نایاب و دیسان چەند رێنوما و بڕیارێن دی ژی هاتنە راگەهاندن.
د كۆمبوونا ئەڤجارە یا فیدراسیۆنێ پڕی گەنگەشە و وەرگرتنا دووڤچوونان تایبەت ئەوا یاریگەهێن كێماسی هەین كو بهێنە چارەسەركرن ژ وانا، داخواز ژ یانەیا دهۆك هاتییە كرن پۆلیسێن ئێمناهییا یاریگەهێ بەری دەستپێكرنا یاریێ ب چەند خولەكا بەرهەڤبن، هەروەسان یاریگەهـ ب شێوەكێ باشتر بهێتە بەرهەڤكرن، دیسان ئاگەهدارییا یانەیا زاخۆ هاتییە كرن بۆ دابینكرنا رووناهییا ژوورێن خوە گوهۆڕینا یاریزانێن تیما مێڤان و یا دادڤانان، هەروەسان هەمان ئەوان كێماسیێ و داخوازی ژ یانەیێن هەلۆ، شێروانە، سیروانی نوو، چەمچەمال و هەولێر، دیسان یانەیا قەلادزی د خولا پلا ئێك دا، هەروەسان فیدراسیۆنا تەپا پێی یا كوردستانێ سۆپاسیا پۆلیسێن هەمی باژێرێن كوردستانێ دكەن ئەوێن ب ئەركێ ئارامییا یاریگەهێ و جەماوەرێ خولا كوردستانێ رادبن
ژلایەكێ دووڤە د بڕیارێن كۆمبوونێ دا هاتینە: ئەو دادڤانێن د تاقیكرنا كۆپەر كو د قۆناغا ئێكێ دا سەر نەكەڤتین دێ ل شەمبییا بهێت هەولێرا پایتەخت دووبارە تاقیكرن بۆ هێنە ئەنجامدان، دیسان ل هەمان رۆژ دێ تاقیكرن بۆ سەرپەرشتێن خولا پلا دو هێتە كرن، هەروەسان بڕیار هاتە دان قارەمانییا فێرگەهێن كوردستانێ ل 15ێ ڤێ مەهێ دەستپێبكەت ژ پارێزگەها دهۆكێ ب تنێ ئەكادیمییا پیرس پشكدارە.
ژلایەكێ دووڤە فیدراسیۆنا تەپا پێی یا كوردستانێ باشترینێن خولا پلا نایاب یا مەها چرییا دویێ یا بۆری دیاركرن ئەوا شەش گەڕ ب خوە گرتینە تێدا 16 راهێنەرێن خولا نایاب، 16 كاپتنێن تیمێن هەمان خول و چەند دەزگەهێن راگەهاندنێ ئەوێن روومالا یاریێن چالاكیێن خولا كوردستانێ دكەن ژ وانا رۆژنامەیا ئەڤرۆ كو رێژەیا وان گەهشتنە 52 دەنگا، پشتی ڤاڤارتنا دەنگان باشترینێن مەها چرییا دویێ بڤی رەنگی بوون، هۆگر عەبدوللا وەكو باشترین راهێنەر ژ یانەیا دەربەندیخان ب كۆمكرنا 29 خالان، فەرزندە محەمەد ب كۆمكرنا 19 خالان باشترین یاریزان، دلێر حاتم ب كۆمكرنا 24 دەنگان باشترین گۆلپارێز.
