ئەڤ سالە فەستیڤال و یاریێن سەر بەفرێ دێ هێنە ئەنجامدان
هەولێر، قائید میرۆ:
پەیڤدارێ دەستەیا گەشتوگوزارا هەرێما كوردستانێ ئاشكرا كر، پلان هاتیە دانان ب مەرەما پێشوازیا گەشتیارێن زڤستانێ و بڕیارە ل هەموو دەڤەرێن چیایی فەستیڤال و چالاكیێن بەفرێ بهێنە ئەنجامدان و هەژمارەكا بەرچاڤ یا گەشتیاران دێ پشكداریێ تێدا كەن.
ئیبراهیم عەبدولحەمید، پەیڤدارێ دەستەیا گشتیا گەشتوگوزارێ بۆ رۆژناما ئەڤرۆ دیار كر، پلان هاتیە دانان ب مەرەما پێشوازیێ ل گەشتیارێن زڤستانێ و بۆ ڤێ مەرەمێ بڕیارە چەندین چالاكیێن تایبەت ب وەرزێ زڤستانێ ل هەموو دەڤەرێن هەرێما كوردستانێ بهێنە ئەنجامدان، ب تایبەتی ل دەڤەرێن چیایی دێ فەستیڤالێن سەر بەفرێ و یاریێن تایبەت ب بەفرێ ڤە هێنە كرن، هەژمارەكا بەرچاڤ یا گەشتیاران ژی دێ پشكداریێ تێدا كەن.
ئیبراهیم عەبدولحەمید گۆت: «سالێن بۆری ب تنێ د وەرزێ هاڤینێ دا گەشتیاران سەرەدانا هەرێما كوردستانێ دكر، بەلێ نوكە د هەموو وەرزان دا گەشتیار سەرەدانا هەرێما كوردستانێ دكەن و پلان هاتیە دانان بۆ زڤستانا ئەڤ سالە هەژمارەكا زۆرا گەشتیاران ل هەموو دەڤەرێن ئیراقێ بەر ب دەڤەرێن هەرێما كوردستانێڤە بهێن و بەرهەڤی هاتینە كرن ل سەر ئاستێ هەر هەشت رێڤەبەریێن گشتی یێن گەشتوگوزارێ بۆ پێشوازیێ ل گەشتیارێن زڤستانێ».
