فڕۆكەیێن توركیا نێزیك سەنتەرێ ناوچەداریا بامەڕنێ بوردۆمان كر و كەسەك شەهیدبوو
ئامێدیێ، مەحمود نهێلی:
ژ ئەنجامێ بوردۆمانا فڕۆكێن بێ فڕۆكەڤان یێن توركیا ل ناوچەداریا بامەرنێ دو وەلاتیێن سڤیل دبنە قوربانی، كو ئێك ژ وانا خەلكێ دەڤەرداریا باتیفایە.
ئێك ژ كەسوكارێن قوربانیان بۆ رۆژناما ئەڤرۆ دیار كر، دوهی سپێدێ ٥/١٢/٢٠٢٣ درۆنێن توركیا ب سێ موشەكان پڕۆژەكێ خزمەتگوزاری ل نێزیك سەنتەرێ ناوچەداریا بامەرنێ كریە ئارمانج و د ئەنجامێ دا كەسەكی بناڤێ (عەلی جەمیل كەلەش گولی) گیانێ خوە ژ دەست دایە و كەسەكێ دی ژی بناڤێ (مەتین سەدیق) بامەرنی برینداربوویە و گۆت: «ئەڤ هەر دو كەسە كرێكار بووینە و ل سەر پڕۆژەیێ چێكرنا جۆیەكا ئاڤدێریێ ل وێ ناوچێ كار دكر و ل دەمژمێر حەفتێ سپێدێ كەفتینە بەر بوردۆمانا فرۆكێن توركیا و ئێك شەهید بوو، ئێك ژی برینداربوویە».
ئەو كەسێ شەهید بووی ناڤێ وی (عەلی جەمیل)ە و ژییێ وی ٤٣ سالن و خەلكێ دەڤەرداریا باتیفایە و بابێ چار زارۆكایە و بۆ كارێكاریێ هاتبوو ناوچەداریا بامەرنێ و دەمێ هەڤالێ وی بریندار بووی وی بزاڤ دكرن خوە بگەهینتە د ناڤ مالان دا ل سەنتەرێ ناوچەدارێ، داكو خەلكێ ناوچەداریێ ل سەر روودانێ ئاگەهدار بكەت، لێ ب مخابنی ڤە دو مۆشەكێن دی ئاراستەی وی هاتینە كرن و ئێك ژ وانا بەركەفتیە و شەهید بوویە.
وەلاتیێ برینداربووی ژی خەلكێ بامرنێ بخوەیە و كارێ شڤانیێ و كرێكاریێ دكر و ژییێ وی ٢٣ سالن و نوكە رەوشا وی یا جێگیرە و ل ژێر چاڤدێریا نۆشداران دایە ل نەخۆشخانا هەوارهاتنا دهۆكێ.
