هۆلەكا هەلكەفتان ل ناوچەداریا دێرەلۆكێ دێ هێتە چێكرن
ئامێدیێ، مەحمود نهێلی:
رازیبوون ل سەر چێكرنا هۆلەكا هەلكەفتان ل سنورێ ناوچەداریا دێرەلۆكێ هاتیە كرن و پارێ پێدڤی بۆ هاتیە تەرخانكرن.
رێبەر سادق، رێڤەبەرێ ناوچەداریا دێرەلۆكێ بۆ رۆژناما ئەڤرۆ دیار كر، چێكرنا هۆلەكا هەلكەفتان ئێك ژ داخوازیێن وان و خەلكێ دەڤەرێ ب گشتی بوویە، ژ بەر كو هەتا نوكە چ هولێن وەسان ل ناوچەداریا وان نەبووینە، كو چالاكیەك یان ژی رێورەسمەك تێدا بهێتە ئەنجامدان و گۆت: “ل سەر داخوازیا مە و خەلكێ دەڤەرێ ب خوەشحالی ڤە رازبیوون ل سەر چێكرنا هولەكا هەلكەفتان ل سنوورێ ناوچەداریا دێرەلۆكێ هاتە كرن و گوژمێ 234 ملیۆن و 900 هزار دیناران بۆ هاتینە تەرخانكرن”.
ناڤهاتی گۆتژی: “مە ل گەل باژێرڤانیێ جهەكێ گونجایی بۆ دەستنیشانكریە ل نێزیك وەستگەها دێرەلۆكێ یا كارەبێ و د دەمەكێ نێزیك دا دەست ب كارێ چێكرنا وێ دێ هێتە كرن و كەڤیتە د خزمەتا خەلكێ دەڤەرێ ب گشتی دا”.
