ب گوژمێ زێدەتری چار ملیار دیناران پڕۆژە ل ئامێدیێ د وارێ ب جهئینانێ دانە
ئامێدیێ، مەحمود نهێلی:
رازیبوون ل سەر چێكرنا هەژمارەكا پڕۆژەیێن خزمەتگوزاری ل سنوورێ دەڤەرداریا ئامێدیێ هاتیە كرن و د دەمەكێ نێزیك دا دێ كەڤنە د خزمەتا خەلكێ دەڤەرێ دا.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، د چارچوڤێ وان پڕۆژەیێن خزمەتگوزاری دا یێن هاتینە راگەهاندن، دو پڕۆژەیێن گرنگێن گەشتیاری ل دەڤەرا ئامێدیێ دێ هێنە بجهئینان و گۆت: “پڕۆژەیێ چێكرنا رێكا پیادە ل ئامێدیێ، كو سەنتەرێ باژێرێ ئامێدیێ ب چەندین جهێن شوونەواری ڤە گرێ ددەت و ئەڤ رێكە ل دەوروبەرێن ئامێدیێ دزڤریت، ئێكە ژ پڕۆژەیێن گرنگ و دێ كەڤیتە د وارێ بجهئینانێ دا”.
دیار ژی كر، هەر د ناڤ وان پڕۆژەیان دا ل ناوچەداریا سەرسنكێ ژی هەژمارەكا رێكێن پیادە و شوستە و رێكێن ناڤخوەیی دهێنە چیكرن ل گەل چێكرنا پاركەكێ و گۆت: “بۆ ئەنجامدانا ڤان پڕۆژەیان دۆرێن چار ملیار و ٥٠٠ ملیۆن دیناران هاتینە تەرخانكرن و د دەمەكێ نێزیك دا دەست ب چێكرنا وان دێ هێتە كرن و دێ كەڤنە د خزمەتا خەلكێ دەڤەرێ و گەشیاران دا”.
وارشین سەلمان گۆتژی: “نوكە پڕۆژەیێ چێكرنا پارەكەكێ ل دەرازینكا باژێرێ ئامێدیێ د قووناغێن داویێ دایە و ل نێزیك دێ كەڤیتە د خزمەتا خەلكێ دەڤەرێ دا”.
