به‌غدا چاره‌سه‌رى یان ده‌رده‌سه‌رى؟
حوكمه‌تا به‌غدا ل به‌ره، نیازه، بڕیاره.. بڕه پاره‌كى چ وه‌كى قه‌ر، هه‌روه، سولفه.. بۆ مه‌هه‌كێ یان پتر بۆ هه‌رێما كوردستانێ ره‌وانه‌كه‌ت. لێ ئه‌ڤ بڕه پاره نه‌منه‌ته چونكى كه‌سێ باوه‌ردار منه‌تا منه‌تداران نه‌ڤێت.
لێ به‌غدا كه‌نگى خودان سۆز و بڕیاره، دا سۆزێن خوه ببه‌ته سه‌رى؟ هه‌ر ل هه‌بوونا به‌غدا هه‌تا ئه‌ڤرۆ هیچ ده‌مه‌كى حوكمه‌تێن به‌غدا باشى و ساخى بۆ كوردستانێ د فه‌رهه‌نگا خوه دا نه‌حه‌واندییه.
ئه‌ڤ بڕیاره ژى هات پشتى سه‌رۆكێ هه‌رێما كوردستانێ سه‌ره‌دانه‌ك بۆ به‌غدا كرى و كۆمبوونێن به‌رفره‌ه ل گه‌ل به‌رپرسێن به‌غدا ئه‌نجامداى و ب وێره‌كانه به‌حسى ره‌وشا هه‌رێمێ كرى.
هێشتا ئه‌ڤ بڕیاره نه‌چوویه سه‌رى، كا دێ بۆ چه‌ندێ سه‌رگریت، لێ سه‌قایه‌كێ دلخۆشكه‌ر دایه فه‌رمانبه‌ران. سه‌رهندێ را مامۆستایێن نه‌رازى ل ده‌ڤه‌را سلێمانیێ و هه‌له‌بچه داخۆیانییێن نه‌ڕێك دان. ل ڤێره ئه‌ز دبێژم ئه‌ز ل گه‌ل هندێ مه هه‌مى فه‌رمانبه‌ر و مامۆستا مووچه‌یێن خوه بێ گیرۆ بوون وه‌رگرن، بێ مووچه‌یى ده‌رده‌كێ گرانه، راسته دبێژن ما ئه‌م مارین دێ ب ئاخێ ژین؟ ئه‌ز دبێژمێ مافێ وه‌یه نێ هه‌تا مار ژى ب ئاخێ ناژیت!
ئه‌ز نه‌به‌س ل گه‌ل پێدانا مووچه‌یێن مامۆستا مه، ئه‌ڤه نه‌منه‌ته به‌لكى ساكارترین مافێ وانه، ئه‌ز ل گه‌ل پله‌بلندكرن و دامه‌زراندنا وان مه ژى. به‌س داخۆیانییا ده‌سته‌یا داكوكیكرنێ ژ مامۆستایێن (ئه‌گه‌ر وه‌سا بیت) دبێژیت: (هنارتنا ئه‌ڤى بڕه پاره‌ى به‌رهه‌مێ به‌رده‌واما خه‌باتا وانه ل سه‌ر بایكۆتكرنا هۆلێن خواندنێ). كته‌كا كومێنتان بۆ هاتن دگۆتن ئه‌ڤه به‌رهه‌مێ ژ ده‌ستدانا ساڵه‌كا قوتابیانه. به‌رسڤا من بۆ وان، ئه‌گه‌ر به‌غدا كوردستان ڤیابه هه‌ر ل رۆژا ئێكێ دا مووچه‌یان ره‌وانه‌كه‌ت، لێ باش ل بیرا هه‌وه‌یه ده‌مێ هه‌وه هه‌ڵداین بچنه به‌غدا هه‌ر ل ئێكه‌مین زالگه‌ها حه‌شدێ هوین پاشدا ڤه‌گه‌ڕاندن و كرپێنى ژ هه‌وه نه‌هات. ل ده‌مێ هه‌بوونێ ل سالێن 2009، 2010، 2011 و 2012، هه‌مى مووچه ب بێمنه‌تى و به‌رده‌مى ژ ئالیێ حوكمه‌تا هه‌رێما كوردستانێ ڤه دهاتنه دان چونكى هه‌بوون، نابیت ل ده‌مێ هه‌بوونێ نه‌بوون هه‌بیت! به‌س گه‌ر نه‌بیت؟ هێشتا د داخۆیانیێ دا هاتیه، (به‌رێ و نها ژى باوه‌ریا مه وه‌سا بوویه كو چاره‌سه‌رى تنێ و تنێ ل به‌غدایه.) گه‌ر چاره‌سه‌رى ل به‌غدایه فه‌رموون بلا به‌غدا مووچه‌یێن هه‌ر سێ مه‌هێن سالا 2004 فڕێكه‌ت، لێ به‌روڤاژى نه‌چاره‌سه‌رى به‌لكو ده‌رده‌سه‌رى ل به‌غدایه. داخۆیانى هێشتا دبێژیت: (به‌روڤاژى ئه‌وێن د قۆڕاڤا كوردایه‌تیێ دا ماین)، به‌رسڤا ڤێ كوردایه‌تى نه قۆڕاڤه لێ كانیه‌كا زه‌لال و پرانسیب و ئارمانجه.
پارێزگارێ سلێمانیێ بانگه‌وازیه‌كا مامۆستایان دكه‌ت و دبێژتێ بلا ئه‌ڤه به‌رهه‌مێ هه‌وه بیت، لێ فه‌رموون ڤه‌گه‌ڕنه هۆلێن خواندنێ، لێ كۆمه‌كا كومێنتێن ناشرین بۆ هاتن و دبێژن مووچه ژى بێن بایكۆت هه‌ر به‌رده‌وامه.
عزه‌ت یوسف
