هه‌رێما كوردستانێ د ناڤ گوهۆڕینان دا
ئه‌ڤین بارزانی
سیسته‌مێ نها یێ سیاسی ل رۆژهه‌لاتا ناڤین د قه‌یرانێ دایه، ئه‌مریكا و وه‌لاتێن زلهێز ژی چو پرۆژه بۆ گوهۆڕینه‌كا نوو ل ده‌ڤه‌رێ نینن، تشتێ هه‌تا نها ئه‌مریكی ل ئیراقێ یان ژی ل سووریێ كری تنێ بۆ پاراستنا پێگه‌ه و به‌رژه‌وه‌ندیێن خوه بوویه و پشتی شه‌رێ غه‌زه ره‌وشه‌كا نوو هاتیه پێش و ئه‌مریكا ژی نه‌ڤێت خوه بكه‌ته پشكه‌ك ژ قه‌یرانا نها ل ده‌ڤه‌رێ، به‌لكو ئه‌مریكا دڤێت ب هه‌ر ره‌نگێ هه‌ی پێگه‌هێ خوه یێ نها بپارێزیت و بهێزتر ژی بكه‌ت، لێ ئسرائیل ل ئالیه‌كێ و وه‌لاتێن دی یێن هه‌ڤپه‌یمانێن ئه‌مریكا ژی ژ ره‌وشا نها رازی نینن و وان ژی به‌رژه‌وه‌ندیێن خوه دڤێت.
ئێرشێن ڤێ دووماهیێ یێن ئه‌مریكا ل سه‌ر گرۆپێن چه‌كدارێن سه‌ر ب ئیرانێ نیشا دده‌ت ئه‌مریكا ب ره‌نگه‌كێ راسته‌وخوه نه‌ڤێت شه‌رێ ئیرانێ بكه‌ت، ئانكۆ یا نها ئیدارا بایدن دكه‌ت تنێ بۆ بابه‌تێ رایا گشتی یا ناڤخوه‌یێ ئه‌مریكا یه و بایدن و ئیدارا وی چه‌ندین جاران ژی ئاشكرا كرینه وان نه‌ڤێت شه‌رێ ئیرانێ بكه‌ن.
شیعه ل به‌غدا هه‌رێما كوردستانێ وه‌كو هه‌ڤپه‌یمانا ئه‌مریكا دبینن و هه‌ر ده‌مێ ئه‌مریكا فشار ل به‌غدا كربن یان ژی ئێرشی وان كربیت، هێزێن سه‌ر ب ئیرانێ و هه‌تا ئیران بخوه ژی به‌رێ خوه داینه هه‌رێما كوردستانێ، ژ به‌ر ڤێ یه‌كێ ژی دبیت پشتی ئێرشێن ڤێ دووماهیێ جاره‌كا دی گرۆپێن چه‌كدار بزاڤا ڤێ یه‌كێ بكه‌ن دیسا ئێرشی هه‌ولێرێ بكه‌ن، ژ به‌ر ڤێ یه‌كێ ژی دڤێت هه‌رێما كوردستانێ ژی هنده‌ك داخوازیێن بله‌ز ژ ئه‌مریكا هه‌بن.
دانا سیسته‌مێ به‌رگیێ مۆشه‌كی ئێكه ژ وان داخوازیێن سه‌ره‌كی یێ هه‌رێما كوردستانێ، ل ئالیێ دی دڤێت هه‌رێما كوردستانێ د ئاستێ ناڤخوه‌یی دا ژی بله‌ز ده‌ست ب هنده‌ك كارێن پێدڤی بكه‌ت. گه‌له‌ك یا گرنگ وه‌كو پێنگاڤه‌كا ده‌ستپێكی هه‌موو هێزێن سیاسی بله‌ز كۆمبن و ل هه‌مبه‌ر هه‌ر مه‌ترسیه‌كێ ل سه‌ر هه‌رێما كوردستانێ پێكڤه كار بكه‌ن، چونكی ده‌ڤه‌را رۆژهه‌لاتا ناڤین به‌ر ب گوهۆڕینێن بله‌ز ڤه دچیت، پێدڤیا مه وه‌كو هه‌رێما كوردستانێ ب ستراتیژیه‌كا نشتیمانی هه‌یه، خالا دی یا گرنگ ژی دڤێت بله‌ز هێزێن پێشمه‌رگه‌ی ببنه ئێك و ل ژێر ئێك فه‌رمانده‌هی دا كار بكه‌ن، چونكی ده‌مه‌كه ئه‌مریكا و هێزێن هه‌ڤپه‌یمانان ڤێ داخوازیێ ژ هه‌رێما كوردستانێ دكه‌ن، نها ده‌مه‌ك گه‌له‌ك گونجایه هه‌رێما كوردستانێ ب رێیا هنده‌ك گوهۆڕینا پێگه‌هێ خوه بهێز بكه‌ت.
نابیت وه‌كو هه‌رێما كوردستانێ ئه‌م چاڤه‌رێی ڤێ یه‌كێ بین كا دێ چ روو ده‌ت دا ل گۆر هندێ ئه‌م ژی ده‌ست ب هنده‌ك بزاڤان بكه‌ین، هنده‌ك كارێن گه‌له‌ك فه‌ر و گرنگ هه‌نه دڤێت هه‌ر زوو بهێنه كرن، ئێك ژ ڤان خالان ژی بابه‌تێ بهێزكرنا پێگه‌هێ ئابووری یێ هه‌رێما كوردستانێ یه، به‌غدا ناهێلیت ئه‌م په‌ترۆلا خوه بفرۆشین، لێ ئه‌و یه‌ك رامانا هندێ ناده‌ت دڤێت ئه‌م چ نه‌كه‌ین، دڤێت ل هه‌رێما كوردستانێ ده‌ست ب شوره‌شه‌كا كشتوكالی و پیشه‌سازیێ بكه‌ین و ده‌م یێ هاتی ئه‌م ئێدی پشتا خوه ب كه‌سێ گه‌رم نه‌كه‌ین، به‌لكو دڤێت ئه‌م ب هه‌موو ره‌نگه‌كێ پێگه‌هێ خوه یێ ئابووری بهێز بكه‌ین، كه‌رتێ كشتوكالێ و پیشه‌سازی دڤێت بهێنه بهێزكرن و وی ده‌می دێ پێگه‌هێ سیاسی یێ هه‌رێما كوردستانێ ژی گه‌له‌ك بهێزتر لێ هێت.
