بیرھاتنا محەمەد شێخۆ دێ ھێتە ساخکرن
ئەڤرۆ نیۆز، سالار دۆسکی:
ب ھەلکەفتا رۆژا بوونا (بارزانیێ) نەمر و سەرھلدانا باژێرێ دھۆکێ کو دکەڤیتە(١٤) ئادارێ، رێڤەبەریا گشتی یا رەوشەنبیری و ھونەری ل پارێزگەھا دھۆک، رێڤەبەریا ھونەرێ مۆزیکێ دێ بیرھاتنا وەغەرکرنا ھونەرمەندێ مەزن(محەمەد شێخۆ) ب چەندین چالاکیان ل ھولا ئێکەتیا نڤیسەران ل دھۆکێ ھێتە ساخکرن.
سەمەدار مایی، رێڤەبەرێ ھونەرێ مۆزیکێ بۆ ئەڤرۆ نیۆز دیارکر کو بیرھاتن ل سپێدەھی یا رۆژا شەمبی رێکەفتی ١٤/٣/ دەمژمێر ١١ سپێدێ و ب پشکداریا تیپا دھۆک یا مۆزیکێ سترانبێژ (دەلال زاخۆیی) ھێتە ساخکرن و دیسان ب ھەمان ھەلکەفت پەرتووک ل سەر ژیانا ھونەرێ ھونەرمەند (محەمەد شێخۆ) ھاتیە بەرھەفکرن دێ ھێتە بەلاڤەکرن، ل گەل سیدیەکی و رۆژنامەکێ ل سەر ھونەرێ وی ھێنە بەلاڤەکرن.
ھەڤدەم لدووڤ زانیاریێن دەست ب ئەڤرۆ نیۆز کەفتین کو ب ھەمان ھەلکەفت سمینارەک بۆ ھەردو بەرێزان(نێرەت محەمەد حەسەن، اسماعیل بادی) دێ ھێتە گێران ل دۆر ھونەرێ محەمەد شێخوە و دیسان ریپورتەک ژی ب ھەمان ھەلکەفت ھاتیە بەرھەفکرن و دێ ھێتە پێشکێشکرن.
