رێكا گەشەپێدانێ بۆ ئیراقێ و هەرێما كوردستانێ و هەموو دەڤەرێ یا گرنگە
سەبارەت ئیمزاكرنا رێككەفتنا رێكا گەشەپێدانێ د ناڤبەرا هەرچار وەلاتێن (ئیراق، توركیا، ئیمارات و قەتەر) و كاریگەری و ئەنجامێن وێ، شرۆڤەكارەكێ سیاسیێ یێ قەتەری رادگەهینیت: رێكا گەشەپێدانێ بۆ ئیراقێ، هەرێما كوردستانێ، قەتەر، ئیمارات، توركیا و هەموو دەڤەرێ رێكەكا گرنگە.
د. عەلی ئەلهێل، شرۆڤەكارێ سیاسیێ قەتەری گوت» هەرێما كوردستانێ پەیوەندیێن باش ل گەل هەموو وەلاتێن دەڤەرێ یێن هەین».
سەبارەت پێگەهێ هەرێما كوردستانێ ل دەڤەرێ، ئەلهێل گوت» ژ روویێ جیۆسیاسی و ستراتیژیڤە، هەرێما كوردستانێ خالا ئێكگەهشتنا ئیراقێ و توركیا و گەلەك وەلاتێن دی یێن جیهانێیە».
دوپاتكر ژی» وەلاتێ قەتەرێ یێ رژدە ل سەر ئەوێ چەندێ پەیوەندیێن وێ ل گەل هەرێما كوردستانێ د ئاستەكێ باشدا بن».
ژ ئالییەكێ دی ڤە ئەوی شرۆڤەكارێ سیاسییێ قەتەری گۆت» پێدڤییە كێلگەهێن پەترۆلێ ل پارێزگەها كەركووكێ سەر ب هەرێما كوردستانێ ڤە بن».
پڕۆژەیێ رێكا گەشپێدانێ پێكهاتییە ژ رێكا ئەردی و ئاسنی كو ب رێكا بەندەرێ (فاو) ل باشوورێ ئیراقێ، دەرگەهێ پێشابیرێ ل هەرێما كوردستانێ، ئیراقێ و وەلاتێن كەنداڤی ب توركیا و وەلاتێن ئۆرۆپا ڤە گرێددەت و زێدەتر ژ 25 وەلاتان بۆ ئالۆگۆرییا بازرگانی دێ ژێ د مفادار بن.
گۆژمەیێ پێشبینی كری بۆ پڕۆژەیێ رێكا گەشەپێدانێ 17 ملیار دۆلارن و بڕیارە ل دەستپێكا سالا 2024 دەستپێبكەت و ل 2028 ب دووماهی بهێت، درێژییا هێلا ئاسنی هزار و 175 كیلۆمەترن و درێژییا رێكا ئەردی هزار و 190 كیلۆمەترن.
