تابلۆیێ عەبدولرەحمان بامەرنی
رێژین حكمەت
تابلۆیێ ئەز دێ بەحس كەم، تابلۆیەكێ شێوەكاری نینە، بەلكو كورتە چیرۆكەكە ژلایێ (عبدالرحمن بامەرنی)ڤە هاتییە نڤیسین و ل گوڤارا پەیڤ ژمارە 91 هاتییە بلاڤكرن. تشتێ سەرنجا من ژڤێ كورتە چیرۆكێ راكێشای، هەر وەكو ئەز ل پیشانگەهەكا شێوەكاری و ل چەند تابلۆیان دنێرم، لێ چەند تابلۆ دئێك تابلۆدا بتنێ خواندنێن جودا، ب رامانا هەر تابلۆیەكی چیرۆكا خوە هەیە و د هەمان دەمدا ئێك تابلۆنە و چیرۆكا ڤان تابلۆییان ژی، پێشمەرگەیەكە ل شەرێ داعش یێ شەهید بووی و ئەڤ پێشمەرگە دهێتە ڤێ پێشانگەهێ و ل تابلۆیان دنێریت، هەر تابلۆیەك ژ وان چیرۆكەكا نە تەمامكریە، بۆ نموونە ل تابلۆیێ ئێكێ پێشمەرگەیەكی د خوینێ وەربووی دبینی و قولپكا چاكیتێ وی دبینیت، كو ب رەنگێ دلییە و ئێكسەر بیرا وی ل هەڤژینا وی دهێت كو وێ ئەو قولپك بۆ بر بوو چاكیتێ وی و گوتبوویێ دا ل بیرا تە بیت دا سەر سالا هەڤژینیا مە ژبیرنەكەی مەسجەكا حەژێكرنێ بۆ من فرێكەی و بیرا ڤی پێشمەرگەی ل ڤێ رۆژێ دهێت، كو سەر سالا هەڤژینیا وانە و دەستێ خوە ددەتە موبایلێ دا ریسالەكێ بۆ فرێكەت و هوسان تابلۆییێن دیفرا، ئێك گرێدایی دایكا وییە و ئێك ژی كچا وی یا شەش سالی و خێزانا وی و هوسا هەر چار تابلۆیان و چار چیرۆك و چار ڤەگەریان بۆ بیرهاتنێن پێشمەرگەی، مەبەستا من ب ڤێ سەرنج راكێشانێ ژی نە بتنێ ئەو تابلۆ بوون، بەلكو ڤان تابلۆیان گرێدانەك ب خودیێ وی پێشمەرگەی ڤە هەبوون ئەوێ خوینا خوە كریە قوربانی هەر وەكو د ئێك ژ تابلۆیان دا دبێژیت: ((ئەڤ تابلویێ دووماهیێ لبەر راوەستیای، ئالایەكێ پەرتیێ رەش ژ دوورڤە دیاردكەت و دا كچا وی یا شەش سالی و خێزانا وی د پاراستی بن، بەرەڤ ڤی شەری هاتبوو… بەری سەرما هناڤێن وی ب گەزینیت، ئاخفتنێن كچا وی هاتنە بیرێ، دەما گوتیێ: «دەما دهێی، چاكیتەكێ زڤستانێ بۆ من دگەل خوەبینە».)) لدووماهیێ بڤی رەنگی قفلا چیرۆكێ هاتیە ((دەما ل وی دەستی ژی زڤری یێ كەتیە سەر ملێ وی، شێوەكاری ب دلەكێ سار گۆتێ: «ڤەگەرە ناڤ تابلۆیی، ژبەركو دەمێ تە بدووماهی هات)).
ژ ڤێ كورتە چیرۆكێ ژی، بدیتنا من چیرۆكنڤیسی یێ شیای دو كاران تێكەلی ئێك بكەت، ئەو ژی شێوەكاری و نڤیسین، یان كو ئەگەر هونەرمەندەكێ شێوەكاری ڤان تابلۆیان ب فرچەی و رەنگان ژی دروست بكەت و ب هلاویسیت رەنە دێ هەمان تشت بن بەلێ دبیت بۆ شێوەكاری ب زەحمەتر بن ژبەر شێوازێ نڤیسینێ یان ئەو نویاتیا چیرۆك نڤیسی وەك تەكنیك بكارئینای، ئەو ژی بەرێخودانا تابلۆی دهەمان دەمدا ڤەگریان بۆ بیرهاتنان یان تشتێن نە تەمامكری و ل ڤێرە شێوەكار نەشێت تشتەكی هوسا بكەت ئەگەر ب نڤسین نەبیت و یا من دڤێت بێژم، نڤیسەرێ چیرۆكێ هەولا دای دو تشتان تێكەلی ئێك بكەت و بێژیت ئەڤە جۆرەكێ دیێ نڤیسینێ یە ئەو ژی قەلەم و فرچە و چەند یێ سەركەفتی بوویە، ئەو دێ كارێ رەخنەگرەكی بیت، لێ خۆشیا من ژڤێ چیرۆكێ دیتی، نڤیسەری هەر وەكو ل سەر نڤیسی (ژ ئەدەبێ داعشێ)، یێ شییایی وێنەكێ جوان ژ شەرێ تیرۆرێ دروست بكەت و بكەتە كارەكێ هونەری.
