برووسكە چیرۆك
ئەدیب عبداللە
ئەگەر راستە من ئەو دەم مایە، بۆچی هوین كفنێ من نا دەنە من.
***
هاتن هندەك بن ئاڤ كرن، یێن دی هندەك بن گۆڕ كرن، یێن دویڤدا هندەك شەرمزاركرن.
مە ژی هندەك رسوا كرن.. یێن بهێن ژی ب خێر بهێن.
***
من دڤیا وێنا دگەل هەوە هەمییان بگرم، دەمێ دمرم دێ هوین هەمی وێنێ من د ئەكاونتێ خۆ دا ئینە خوار، جونكی بتنێ ئەم حەژ وێنا و مرییان دكەین.
***
هندی هند دخرابن ژ ئێك و دو تێربوون، ئەم لبەر پییان چووین.
***
ببۆرە هەكە سەبرا من بێی تە نەهێت.
***
مرنا ل مرنێ نەخۆشتر، خۆشتڤیەكا تە یان خۆشتڤیەكێ تە ل دەڤ تە باركەت، بتنێ ژێهاتنا تە ئەو بیت بێژیێ وەغەر خێر بیت.
***
هوین ئەڤرۆ یا خۆ دبینن، ئەز سوباهییا هەوە دخوینم.
***
ئەم هەمی چاڤەری مرنێ نە، مرن چاڤەرێ كێیە؟ بەری بهێی تو بمرە پاشی وەرە.
***
دوهی من پیاسە دگەل نە دكرن، ئەڤرو لبەر من را بۆری سلاڤا من نە وەرگرت.
***
تو پشتا درەوێ نە قرینی، راستی دێ سەنقلۆز بیتە وێرێ، تو ژی دێ بهایێ خۆ ژ دەست دەی.
***
چ سەردەمەكێ بێ واتا یە، راستیێن من دبنە درەو، درەوێن هەوە دبنە راستی.
***
گرنگە ژیانێ بكەمە قوربانی ژیێ خۆ، نەكو ژیێ خۆ دبن دەست و پێن ژیانێ ڤە بكەمە قەریسە.
***
وی دوهی دگۆت:
یێن نڤیساین مە دەرئێخستن، هزر نە دكر ئەڤرۆ یێن نە نڤیساین دێ وان دەرئێخن.
***
ئەم فێركرین خۆ بۆ ئاخێ بدەینە كوشتن، پا دێ چەوا ئەڤرۆ هێلین ئاخا خۆ بێی كوشتن رادەستی وان بكەین.
***
هەر ئێك بەری ژمارێ هات، لەوا ژمارە ژبیرا من چوو.
***
دێ كەنگی بهایێ بابێ زانی؟
دەمێ تو زربابی دبینی.
دێ كەنگی بهایێ دەیكێ زانی؟
دەمێ تو ژنبابێ دبینی.
دێ كەنگی بهایێ من زانی؟
دەمێ تو من نە بینی.
