پیرەمێرێ چاڤەرێ
وەرگێران ژ فارسی:
سەلوا محەمەد نهێلی
پەرستارا نەخوشخانێ، زەلامەكێ ب جلوبەركێن لەشكەری و یێ ماندی و نیگەرانی ڤە ئینا هنداڤی سەرێ پیرە مێرێ نەخۆش و گۆتە پیرەمێرێ”ئەڤە كورێ تەیە یێ ل ڤێرە” پەرستار نەچار بوو ئاخفتنا خۆ چەند جاران دوبارە بكەت داكو نەخۆش چاڤێن خۆ ڤەكەت، پیرەمێری ب زوری چاڤێن خۆ ڤەكرن و دهەمان دەمدا ژبەر لێدانێن دلی وی ئازار دكێشا، گەنجێ ب جلوبەرگێن لەشكەری راوەستیایی دیت، دەستێ خۆ بەرەڤ وی ڤە درێژكر، سەربازی دەستێ وی گرت و هەست ب گەرماتیا خوشەویستیا وی دكر، پەرستارێ كورسیكەك بۆ سەربازی ئینا و شیا ب رەخ تەختێ وی ڤە روینیتەخوارێ، ب درێژاهیا شەڤێ روینشتە ب رەخ تەختێ وی ڤە، دەستێ پیرەمێری گرت بۆ و گۆتنێن حەژێكرنێ و خۆراگریێ دگۆتن، پشتی دەمەكێ پەرستارێ ژ سەربازی خواست كو بهێنا خو ڤەدەت لێ رازی نەبوو، وی ب چ شێوەكێ های ژ هاتنوچوونا پەرستارێ و دەنگێ شەڤێ یێ نەخۆشخانێ و نالینا نەخۆشان نەبوو، ب درێژاهیا شەڤێ ب ئارامی سحبەت دكرن و پیرەمێر ژی د حالەتێ مرنێ دا بێ كو تشتەكی بێژیت بتنێ دەستێ كورێ خۆ ب درێژاهیا شەڤێ ب توندی گرت بوو، ل دوماهیێ پیرەمێر دمریت و سەربازی ژی دەستێ وی یێ بێ روح بەردا و چو دا كو پەرستارێ ئاگەهدار بكەت و ل هیڤیا وێ ما تا ئەو كارێ خو ئەنجام بدەت، دەمێ پەرستار هاتی و دیتی پیرەمێر یێ مری، سەرخۆشیێ لێ دكەت بەلێ سەربازی ئاخفتنا وی بری و لێ پرسی:”ئەڤ پیرەمێرە كی بوو؟”، پەرستارێ ب مەندەهۆشیڤە بەرسڤا وی دا:”بابێ تەیە!”، سەربازی گۆت:” نە ئەو نە بابێ من نە، من ژ نوو ئەو دیتیە”، پەرستارێ گۆتێ:”پا بۆچی دەمێ من تو بریە دەڤ وی تە چ نەگۆت؟” سەربازی بەرسڤ دا:”من زانی تو یا خەلەت بووی بەلێ وی زەلامی پێدڤی ب كورێ خو هەبوو و كورێ وی نەل ڤێرە بوو، دەمێ من دیتی هندێ نەخۆشە كو نەشێت بزانیت ئەز نە كورێ وی مە و چەند پێدڤی ب هەبوونا من هەبوو من بریار دا بمینم. هەر چاوا بیت ئەز ئەڤ شەڤە هاتبوومە ڤێرە داكو جنابێ (ویلیم گری) ببینم ژبەركو ئەڤرۆ كورێ وی د شەریدا یێ شەهید بووی، ئەزێ هاتیمە راسپاردن دا ڤی دەنگوباسی بگەهینمێ، ب راستی ناڤێ ڤی پیرەمێری چ بوو؟ چاڤێن پەرستارێ تژی رۆندك بوون و گۆت:” جنابێ ویلیم گری…”. جارەكا دی ئەگەر كەسەكێ پێدڤی ب تە هەبوو ل ڤێرە بمینە بتنێ نەهێلە، ئەم مرۆڤ نینن كو ب ئەزموونەكا روحی دەرباز بین، بەلكو ئەم روحین كو دئەزموونەكێ مروڤی دا دەرباز دبین.
