18 پڕۆژەیێن پیشەسازی و وەبەرهێنانێ ل دهۆكێ دێ هێنە بجهئینان
ب سەرپەرشتیا د. عەلی تەتەر، پارێزگارێ دهۆكێ كۆمبوونا ئاسایی یا لیژنا بلند یا پیشەسازی و وەبەرهێنانێ هاتە ئەنجامدان و د كۆمبوونێ دا گەنگەشە ل سەر هەژمارەكا داخوازی و پڕۆژەیێن پیشەسازی و یێن وەبەرهێنانێ یێن خودان كار و سەرمایەدارێن پارێزگەهێ هاتە كرن.
هەر د كۆمبوونێ دا لیژنا بلند رازیبوونا خۆ ل سەر دامەزراندن و ئاڤاكرنا ١٨ پڕۆژەیێن پیشەسازی و وەبەرهێنانێ د بیاڤێن جودا جودا دا دیاركر، ئەڤ پڕۆژە ل جهێن جودا ل سنوورێ پارێزگەهێ دێ هێنە ئاڤاكرن و دەلیڤەیێن كاری بۆ ب سەدان گەنج و خودان پیشەیان دێ دابین كەن.
پارێزگارێ دهۆكێ تەكەز كر كو دڤێت هەموو پڕۆژەیێن رازیبوون ل سەر هاتیە كرن، ل دووڤ رێنمایێن لیژنێ و یاسایێن حوكمەتا هەرێما كوردستانێ بهێنە بجهئینان و بابەتێن ساخلەمیا گشتی و پاقژیا ژینگەهێ ل بەر چاڤ بهێنە وەرگرتن و پشتەڤانیا پارێزگەهێ بۆ هەموو سەرمایدار و وەبەرهێنەران دیاركر.
هەژی گوتنێ یە ئەو پڕۆژەیێن رازیبوون ل سەر هاتیە كرن د ڤان بیاڤان دانە: (كارگەهێن ئاڤێ و دەرمانێن پاقژكرنێ و نۆشداری و بەرهەمێن پترۆلێ و عمباران و كارگەهێن ئەلەمنیۆمی و ئاسنی كەلوپەلێن خوارنێ و جلكان و …هتد).
