هەشت یاریزانێن یانەیا ئافرەتێن دهۆكێ دێ شەڕی بۆ پلێتا نێڤدەولەتی كەن
چاڤەڕێ دهێتە كرن سوبەهی هەڤڕكیێن قارەمانییا ئیراقێ بۆ یارییا تیكۆنجتسۆ والسكی ل سەر ئاستێ كوڕان و كچان ل باژێرێ دهۆكێ بهێتە كرن دەربازبوون بۆ قارەمانییا نێڤدەولەتی، یانەیا ئافرەتێن دهۆك دێ ب هەشت یاریزانان بۆ ئاستێن جودا پشكداربیت.
د داخویانیەكێ دا شیمال محەمەد سالح راهێنەرێ تیما یانەیا ئافرەتێن دهۆكێ بۆ رۆژنامەیا ئەڤرۆ گۆت: بۆ ڤێ قارەمانیێ مە بەرهەڤیێن باش كرینە و دێ ب هەشت یاریزانێن كچ بۆ ئاستێ تازەپێگەهشتیان، پشكۆژ و بود پشكداربین كو دناڤبەرا -18 كگم هەتا دگەهیتە +50 كگم، ئەوا دێ یاریێن وێ ل هۆلا بنگەهێ لاوان ب پشكدارییا هژمارەما مەزن یا یاریزان دگەهیتە زێدەتری 100 یاریزانێن كچ و كوڕ ل هەرێمێ و ناڤەڕاست و باشۆرێ ئیراقێ، هەڤڕكیێن وێ سویەهی هەتا شەمبییا بهێت دێ بەردەوامبیت و دبیت یانەیا گارە و بنگەهێ لاوان ژی پشكداربن.
هەروەسان ناڤهاتی گۆت: ئەڤ قارەمانییە گەلەك یا گرنگە و پێنگاڤە بۆ پشكداریێ ب ناڤێ هەلبژارتیێ ئیراقێ د قارەمانییا ڤەكری یا نێڤدەولەتی دا ئەوا دێ پارێزگەها دهۆكێ ل تەباخا بهێت مێڤاندارییا وێ كەت، لەوما دێ ب هەمی شیانێن خوە كاركەین و یاریزان رژدن چەند ژ كێشێن ئاستێن جودا یێن ئێكێ بهێت بۆ ڤێ قارەمانیێ و گەشبینن دێ یاریزانێن مە ل دووڤ هیڤی و ئارمانجێن مە بن و ناڤێ پارێزگەهێ و یانەیا ئافرەتێن دهۆكێ بلند بكەین.
ژلایێ خوەڤە مەحمود ئیبراهیم سەرۆكێ فیدراسیۆنا تیكونجتسۆ و والسكییا ئیراقێ گۆت: ژێگرتنا باژێرێ دهۆكێ ل سەر ئاستێ هەمی باژێرێن ئیراقێ بۆ هەردو قارەمانیێن ئیراقێ و نێڤدەولەتی هات ژبەر هەبوونا خالێن سەركەفتنا قارەمانیێ ژ ئۆتێل، هۆلێن وەرزشی، پشتەڤانی و هەڤكارییا بەرپرسێن حكومی و گەشبینن دێ قارەمانیێن مەزنتر ژی ل پارێزگەها دهۆكێ هەبن و دێ سەركەفتی بن.
