د ئێك خۆلەك دا
ناجح بێجانی
پشتی بۆریــنا ڕۆژەكا ب زەحمەت و ژئەگەرێ شۆلێ گران و لەشك وەستیای هزر ل هنــدێ كــرەڤە، پیچەكێ بهێنا خوە ڤەدت و قەستا ژۆرا نڤستنێ كر، بەلكو دەمەكێ خۆش و ئارام ببۆرینت هەر چو نەبت ژ گێلــەشۆك و گازندە وئارێشێن ژیانێ دویر بكەڤیت، ژ بەركو ئەو ئالاڤێن پێشكەفتی و سەردەمیانە دهێــنە دناڤ بازاری؛ ڕۆژ بۆ ڕۆژێ پێدڤێن ژیانیێ زێــدەتر لێ دهێن و كاودانێن وی یێن ئابۆری و شێانێن وی یێن سنووردار بوون.
ژ نشكەكێ ڤە، بەری چاڤێن وی ژخەوێ گەرم ببن، زەنگا مالا وان درەنگ شەڤە لێدا، سەد ئاوازا جهێ ئیكێ گرت و د وان چركێن كێم وێنە دا مێشكی وی ئالۆز بوو، گەلۆ چ چێبوویـــە؟ شەڤ یا ژ نیڤێ بۆری خودێ خێركت، هێدی هێدی كارێ خوە كر و بەرەف خوارێ هات و ب ڕاستی چ ڕوویدایــە، دڕەنگ شەڤە هزرەك هات و سەد پسیار و بەرسڤ د ئێك وەخت دا دناڤ مێشكێ وی دا تێكەلبوون، نـە – نـە چ چێنەبوویە؟ هەما گەلەك جارا دسەرێ مرۆڤی دا دەنگە دەنگ ڤەددن، ئەز باوەر دكەم ژ بەر هندێ بت، كو ئەڤێ ئێڤارێ باران و بارۆڤــەكا دژۆاڕ هاتبوون، چێدبیت دەرگەهێ حەوشێ مابت ڤەكری و ئەڤە دەنگێ هندێ بت، یانژی ئەو چپكێن بارانێ ل وی چینكووی ددن یێن كو ل سەر بانێ خانی مە داناین داكو بشێن دناڤ دا ژیانا خوە ببۆرین، پشتی كو كارێ خوەكری و بەرەڤ خوارێ و چەند پێنگاڤێن ب زەحمەت هاڤێتن ب نیڤ چاڤگرتیڤە و لەشەك گران و وەستای، جارەكا دی ڤەگەریا سەر جهێ خوە، لێ ڤێ جارێ بترس وخەمۆكی، چما؟ ئەو چ دەنگ بوو ڤێ نیڤا شەڤێ؟ خوە درێژكریڤە، خەو یا ژ چاڤێن وی زیزبووی، بیردانكا وی ڤەگەراند زارۆكینییێ، هێشتا ژییێ وی نە گەهشت بوو دەست ب خواندنێ بكت، هەر شەڤ بابێ وی چیرۆك بوو ڤەدگێران و دبەرا چاڤێن خوە نقاندن و ب دلەك ئارام دنڤست، لێ گەلۆ ئەڤرۆ كی دێ چیرۆكا بۆ من ڤەگێرت دا كو ئارام بنڤم.
