باسكێت بۆلا گاره ده‌ست ب به‌رهه‌ڤییان بۆ خولا كوردستانێ كر
د داخویانیه‌كێ دا راهێنه‌رێ تیما باسكێت بۆلا یانه‌یا گاره یا وه‌رزشی دیار كر دوهی ئێكه‌م یه‌كا راهێنانێ ب به‌رهه‌ڤبوونا كۆمه‌كا باش یا یاریزانێن پارێزگه‌هێ خوه به‌رهه‌ڤكرن بۆ خولا پلا نایابا كوردستانێ ئه‌وا دهێته چاڤه‌ڕێ كرن ژڤانێ وێ د ماوه‌كێ نێزیك دا ژلایێ فیدارسیۆنا باسكێت بۆلا كوردستانێ بهێته ده‌ستنیشانكرن.
زێده‌تر خه‌تاب عومه‌ر بۆ رۆژنامه‌یا ئه‌ڤرۆ گۆت: ب خوون گه‌رمێن یاریزانێن پارێزگه‌هێ و سه‌ربار ئاسته‌نگێن دارایی و نه‌بوونا پشته‌ڤانیێ دوهی ئێكه‌م یه‌كا خوه یا راهێنانێ ل هۆلا گرتییا چالاكیێن وه‌رزشی ئه‌نجامدا خوه به‌رهه‌ڤكرن بۆ وه‌رزێ نوو یێ خولا پلا نایابا كوردستانێ، راهێنانێن مه دێ ل دووڤ به‌رنامه‌كێ تایبه‌ت و رێكخستی بن هه‌تا فیدراسیۆنا باسكێت بۆلا كوردستانێ ژڤانێ خولێ ده‌ستنیشان بكه‌ت، هه‌می یاریزانێن مه گه‌نجن و خودان هیڤی و ئارمانجێن مه‌زنن، هه‌رچه‌نده مه شیانێن ده‌ستڤه ئینانا ناسناڤی نابن لێ ئه‌م رژدین پشكداریه‌كا سه‌رفه‌رازبیت.
هه‌روه‌سان ناڤهاتی گۆت: مخابن ل پارێزگه‌هێ د ده‌مه‌كی دا وه‌رزشا باسكێت بۆلێ د كۆپیتكێ دا بوو و نوكه گه‌هشتیه كێمترین ئاست، مه یاریزانێن خودان شیان هه‌نه بتنێ پێدڤی ب پشته‌ڤانییا یانه‌یێن وه‌رزشی نه بۆ پشكداری د خولێن ئیراقێ و كوردستانێ دا.
بۆ زانین فیدراسیۆنا باسكێت بۆلا كوردستانێ راگه‌هاند بوو دێ خولا پلا نایاب ب پشكدارییا 11 یانه‌یا ڤه‌كه‌ن و دێ ب شێوەیێ خول بیت و یاری ژی دێ هاتن و چون بیت، نڤێسارێن فه‌رمی بۆ هه‌می یانه‌یان هاتینه هنارتن، هه‌روه‌سان راگه‌هاند بوو قاره‌مانییا مینی باسكێت بۆل بۆ ژیێن 2012ێ و سه‌ر دا هێته ڤه‌كرن.
