ل ئەلمانیا دادڤانەكێ دهۆكێ قارەمانیێن فەرمی بڕێڤەدبەت
كوڕێ باژێرێ دهۆكێ و ڕەڤەندا كورد ل وەلاتێ ئەلمانیا و دادڤانێ نێڤدەولەتی بۆ یارییا كاراتێ چالاك عەبدولسەلام ئەترۆشی بۆ ماوەیێ سێ سالە ل وی وەلاتی قارەمانیێن فەرمی ب ڕێڤە دبەت و بوویە ئێك ژ دادڤانێن باووەرپێكری ل كێشوەرێ ئۆرۆپا.
ل دۆر ڤێ یەكێ ناڤهاتی د داخویانیەكا تایبەت دا بۆ رۆژنامەیا ئەڤرۆ گۆت: پێخوەشحالم وەكو ئێك ژ ڕەڤەندا كورد و خەلكێ باژێرێ دهۆكێ و كوردستانێ بوویمە دادڤانەكێ سەرەكی و فەرمی د ناڤ چالاكیێن فیدراسیۆنا ئەلمانی بۆ یارییا كاراتێ و چەندین قارەمانی ژی د ماوەیێ بۆری دا من بڕێڤەبرینە، وەرگراتنا باوەرێ ژ فیدراسیۆنا ئەلمانیی ب سانەهی نینە لێ ژبەركو من باوەرنامەیا پلەیا نێڤدەولەتی یا ئاسیایی هەبوویە و چەندین پشكداری د قارەمانیێن ئیراقێ و دەرڤە كریینە ئەڤچەندە بۆ هاریكار كو بەرپرسێن وەرزشا ئەلمانییا گرنگیێ بمە بدەت و پشكداری خولەكا تایبەت بووم، هەرچەندە باوەرنامەیا وێ پێدڤی ب سالەكێ هەیە ب شێوەیێ تیۆری و پراكتیكی لێ ژبەركۆ هەبوونا باوەرنامەیا ئاسیایی و سیڤیێ باش یێن پشكداریێن من د ماوەیێ هەیڤەكێ دا شیام ب دەستڤە بینم.
هەروەسان چالاك عەبدولسەلام گۆت: پشتی ب دەستڤە ئینانا باوەرنامەیا بۆندس یا ئەلمانی و باوەرپێكری ل ئۆرۆپا من پشكداری كۆمەكا باش یا قارەمانییان ل سەر ئاستێ پارێزگەهێن ئەلمانیا كرییە، دووماهی قارەمانی یا ئینتەرناتیۆنال باسل ئۆپن ماستەر 2024ێ ئەوا نوكە هەڤڕكیێن وێ ل وەلاتێ سویسرا دهێنە كرن.
ل دووماهیێ ناڤهاتی دیار كر پشكدارییا وی وەكو دادڤانەكێ كورد بەلگەیە و بوو هەموو وەرزشڤانێن ئەلمانیا و ئۆرۆپا د یارییا كەراتێ دا دیار كر كو ئەم كورد ژی حەز ژ وەرزشێ و پێشكەفتنا وێ دكەین و مە خودان شیان هەنە، هیڤییا من ئەوە د پاشەرۆژەكا نێزیك دا بشێم ل سەر ئاستێن نێڤدەولەتی یێن مەزن ژی پشكداربم و دێ هەموو بزاڤان كەم و خوە ماندی دكەم هەتا بگەهمە ڤێ ئارمانجێ.