دهۆكێ هەموو ئیراقی و عەرەب ب ئاهەنگا ڤەكرنا خولێ حێبەتیكرن
وێنە: سەركەفت فوتۆگرافەر
ل ئەینیێ ب بەرهەڤبوونا مەسرۆر بارزانی سەرۆكێ حوكمەتا هەرێما كوردستانێ و عەدنان درجال سەرۆكێ فیدراسیۆنا فوتبۆلا ئیراقێ و خافیێر تیبایس سەرۆكێ دەستەیا لالیگا یا ئسپانی و فەرماندە مەنسۆر بارزانی و ئامادەبوونا زێدەتری 30 هزار ژ پشتەڤان و جەماوەرێ وەرزشی ل پارێزگەها دهۆكێ رێورەسمێن ڤەكرنا وەرزێ نوو2024/ 2025 یا خولا ستێرێن ئیراقێ یا فوتبۆلێ ل یاریگەها یانەیا دهۆك یا وەرزشی هاتە ڕێكخستن.
ل دەستپێكا ئاهەنگێ چەند برگەیێن جوان یێن هونەری هاتنە دیتن، هەروەسان موزیكژەنێ مەزن دلشاد محەمەد سەعید ب مۆزیكا خوە چەند ئاواز ڤەژاندن، دووڤدا دو هونەرمەندێن ب ناڤودەنگ حەسەن شەریف و حوسام رەسام ب دو سترانان پشكداربوون، دووڤدا لۆگۆیێ وەرزێ نوو دگەل یێن هەموو یانەیێن پشكدار د خولا ستێرێن ئیراقێ دا هاتە دیتن.
ل دەستپێكا رێورەسمێن ڤەكرنا خولێ مەسرۆر بارزانی سەرۆكێ حوكمەتا هەرێمێ پەیڤا بخێرهاتنێ و ڤەكرنا خولێ بۆ ئامادەبوویان بڤی شێوەی گۆت: جەماوەرێ قەهرەمان و خۆراگر و تێكۆشەرێ دهۆكا ڕەنگین، پێخوەشحالم ئەڤرۆ دگەل هەوە مە دناڤ یاریگەهێ دا كو بۆ جارا ئێكێ یە بڤی شێوەیی ل كوردستانێ ڕێورەسمێن ڤەكرنا وەرزێ نوو یا خولا ئیراقێ بهێتە بەرهەڤكرن بخێرهاتنا هەوە هەموویان دكەم، هەروەسان بخێرهاتنا سەرۆكێ فیدراسیۆنا ئیراقێ و سەرۆكێ دەستەیا لالیگا یا ئسپانی خاڤیێر تیبایس، داخازا دەمێن خوەش بۆ هەوە دكەم و ب هیڤییا دیتنا یارییەكا خوەش دناڤبەرا هەردو یانەیێن دهۆك و زەورا دا.
ژلایێ خوەڤە عەدنان درجال سەرۆكێ فیدراسیۆنا فوتبۆلا ئیراقێ سۆپاسییا مەسرۆر بارزانی سەرۆكێ حوكمەتا هەرێما كوردستانێ كر ژبەر ئامادەبوونا وی و پشتەڤانییا بەردەوام ل وەرزشێ و سۆپاسییا یانەیا دهۆك كر و گۆت: ل پێش خێزانا فوتبۆلا ئیراقێ سۆپاسییا سەرۆكێ حوكمەتا هەرێما كوردستانێ دكەین ب جوانترین شێوە پێشوازییا هەموو وەرزشڤانێن ئیراقێ و دەرڤە هاتییە كرن، بەرهەڤبوونا سەرۆك وەزیرێن كوردستانێ دناڤا رێوەرەسمێن ئاهنگێ بوو مە گەلەك یا گرنگ بوو و بەلگەیە ل سەر بەردەوامییا پشتەڤانییا وی بۆ وەرزشێ ب گشتی ل ئیراقێ.
هەروەسان ناڤهاتی گۆت: دەستخوەشییا ڕێكخەرێن كەرنەڤالا فوتبۆلێ دكەین ئەوا ل یاریگەها دهۆكێ هاتییە كرن هەر ژ كارگێرییا وێ و هەركەسەكێ هەڤكار بووی، دیسان جەماوەرێ بەرهەڤبووین ژی ئەوێن ب شێوەكێ جوان و ڕێكخستی هاتینە دناڤ یاریگەهێ دا و پشتەڤانیەكا سەردەمانە نیشاندا و ئەڤە ژی نە یا سەیرە ژ پشتەڤانێن دهۆكێ و كوردستانێ.
دووڤدا مەسرۆر بارزانی سەرۆكێ حوكمەتا هەرێما كوردستانێ دگەل عەدنان درجال و خاڤیێر تبیاس دناڤا یاریگەهێ دا دگەل پێكهاتیێ هەردو تیمێن یانەیێن دهۆك و زەورا بەرهەڤی یاریگەهێ بوون ژبۆگرتنا وێنەیێن بیرهاتن، هەروەسان بۆ جارا ئێكێ د دیرۆكا فوتبۆلا ئیراقێ دا تەپە ب ڕێیا فڕۆكەكێ دهێتە دناڤا یاریگەهێ دا و بۆ یاریێ دهێتە بەرهەڤكرن.
ژلایێ خوەڤە خالد ئەلحەدی كۆمێنتارێ بەحرێنی یێ بەرنیاس گۆت: ئەز حێبەتی بووم ل سەر باژێرێ جوان یێ دهۆكێ و خەلكێ وێ یێ رحسڤك، جارا ئێكێ یە دهێتە كوردستانێ، ئاهەنگەكا گەلەك جوان بوو، ئیراق و كوردستان گەلەك حەز ژ وەرزشێ و فوتبۆلێ دكەن، دهۆك باژێرەکێ گەلەك جوانە، مێڤاندارییەكا سەركەفتی و خەلكەکێ دل مەزن و قەدرگرن.
ژلایێ خوەڤە احمد خوزەیر یاریزانێ دێرینێ هەلبژارتیێ ئیراقێ و یانەیا دهۆك گۆت: گەلەك كەیفخوەشبووم ل یاریگەها دهۆكێ دووبارە ڤەگەڕیایم وەكو پشتەڤانەك و دیتنا ئێك ژ جوانترین رێورەسمێن ڤەكرنا وەرزێ خولا ئیراقێ یا فوتبۆلێ، بۆ من گەلەك یا گرنگ بوو لەوما ژی من كارێن خوە یێن گرنگ هێلان و هاتمە دهۆكێ، ئاهەنگەكا جوان و رێكخستی و قەشەنگ بوو، سۆپاسییا سەرۆكێ حوكمەتا هەرێما كوردستانێ و كارگێریا یانێ دكەین بۆ ڤێ پێشوازیێ و پێنگاڤەكا نایاب، جەماوەرێ دهۆكێ جوان و خوەشیەكا دی دا خولا ئیراقێ.
