قەركرنا زلكەكێ كبریتێ
نڤێسین: ستیڤن لیكۆك
دبت وەسا هزر بكەی د جاددەیەكێ دا قەركرنا زلكەكێ كبریتێ تشتەكێ ئاسان بت، بەلێ هەر زەلامەكێ هەتا نۆكە وەركربت، دێ تە پشتراست كەت كو ئەو كارە هند ئاسان نینە، دێ یێ ئامادە ژی بت سووند بخۆت كو سەربۆرا وێ ئێڤارێ بۆ وی یا جیاواز بوو.
ل بەر لێڤارا جاددەیێ یێ ڕاوەستیایی بووم، جگارەیەك د دەستێ من دا بوو و من دڤیا هلكەم؛ لەوا چاڤەڕێ بووم هەتا زەلامەكێ سادە و دۆست دیاربوویی و ب نك من ڤە بۆری، من ژی گۆتێ:
-برا زەحمەت نەبت، زلكەكێ كبریتێ بدە من؟
-زلكەكی، بێگۆمان فەرمۆ.
قۆمچكا ساكۆیێ خوە ڤەكر و دەستێ خوە كرە د بەریكا چاكیتی دا.
د درێژیا گۆتنێن خوە دا گۆت: بەلێ بێگۆمان من زلكەكێ هەی. دشێم سووند بخۆم دبنێ بەرویكا من دایە – چاڤەڕێ بە، ئەها دبت د ڤێ بەرویكا سەری دا بت، پیچەكێ خوە بگرە، دا ڤێ چانتێ ب سەر جاددەیێ بێخم.
من گۆتێ: خەمناكەت، نە تشتەكێ مەزنە.
– بەلێ، نۆكە د چركەیەكێ دا دێ بینم، پشتراستم دێ ئێكی ل ڤان دەردۆران بینم.
هەر د ئاخفت، د خوە دخەبتی و دەستێ خوە ژ بەرویكا خوە ئینا دەرێ و گۆت: ئەز دبێژم ئەڤە نە ئەو چاكیتە من كریە بەرخوە.
كابرا هەر ئاخفت و دەست ب گلی و گازندەیان كر.
من ژی خوە نەرازی كر و گۆتێ: باشە، دورستە، چ تشتەك چێنەبوویە، هەكە ئەڤە نە ئەو چاكێت بت یێ بەری نۆكە ل بەر تە، نەكە خەم.
-خۆلەكەكێ خوە بگرە. هۆسا گۆتە من. ئێك ژ وان داركێن نفرەتی یێن ل ڤان دەوربەران هەی. پێدڤیە ل گەل دەمژمێرا من با. پێدڤیە ببینم. نەخێر، ل وێرێ ژی نینە. چاڤەرێ بە، دا دناڤ ساكۆیێ خوە ژی دا لێ بگەڕم، هەكەر ئەو بەرگدروویێ هەبلەتراش یێ شارەزابا، دا بەرویكا وەسا چێكەت، مرۆڤ ب ساناهی ب سەر هلببا.
ئەو گەلەك تێكچوو، دارێ خوە هاڤێت و ب تەخما ددانا كەتە بەرویكا خوە.
ب پێژن ڤە گۆت: ئەڤە كوڕێ من یێ دەبەنگ یا وەكری. ئەوی بەرویكا من یا سەروبنێك كری. ئاخ خودێ! هەكە ئەز گەهشتمە مال دێ زللــەهەكا گەرم ل بن گوهی دەم. كا خوە بگرە، هزر دكەم د بەرویكا پشتێ دا بت. زەحمەت نەبت دێ شێی پیچەكێ ساكۆیێ من هلدەی دا بشێم سەحكەمێ.
دیسا من گۆتێ: نە نە خوە ماندی نەكە، نە تشتەكێ بەركەتیە. دودلیێ بۆ خوە چێنەكە. ژ راست ژی نە تشتەكێ مەزنە. ڤێجا پێدڤی ناكەت ساكۆیێ خوە ژی بێخی. هیڤی ژ تە دكەم، وان نامە و بەلگەیێن خوە نەهاڤێژە و ل ڤارا سەر بەفرێ وەرنەكە! نە نە، ئەو تو چ دكەی! ب پیاڤە نەچە سەر ساكۆیێ خوە! هیڤی ژ تە دكەم وا گۆتنێن كرێت نەبێژە زاڕۆیێ خوە. بەس قەسا بێژێ. ئووو، هیڤی دكەم جلكێن خوە ب وی شێوەیێ دڕندە نەدڕینە.
ژنشكاڤە وی زەلامی هەناسیەك كوور هەلكێشا و ب هەموو خۆشی ڤە دەستێ خوە ژ ناڤ ساكۆیێ خوە دەرێخست و هەوار كر: من دیت، من ل ڤێرە دیت. ها بگرە.
دەستێ خوە ل بەر رۆناهیێ درێژكر و گۆت: ئەڤە چیە، زلكێ ددانایە؟!
ئەز تێكچووم و كەتمە بن كارتێكرنا ڤێ كێلیكێ، من ئەو پالدا و كەتە بن تایرێن ترامێ، و من بازدا.
