شەڕێ سحێلا هێمایـێ خـوەڕاگری و بنگۆڕكرنا خەونێن دوژمان بوو
ديدار، سالار محةمةد دۆسكى:
1 – 4
هەیڤا ئۆكتۆبەرێ ل سالا 2017 حوكمەتا ئیراقێ هەمی بزاڤكرن، قەوارێ سیاسیێ كوردستانێ بگرن و هێزێن ئیراقێ و حەشدا شەعبی ب چەندین هێزێن بیانی و پاسداران ڤە، ب هەمی هێز و چەكێ گران هێرشكرنە سەر پێشمەرگەیێ كوردستانێ، و هەمی بزاڤ كرن كو خالا سنۆرییا پێشابیرێ و دەرگەهێ زاخۆ بگرن، دئەڤان شەرێن گران دا چەندین پێشمەرگە و فەرماندێن مەزنێن پێشمەرگەی شەهید بوون.
جەنابێ فەرماندە مەنسۆر بارزانی، دپەیڤەكا كورت و گرنگ دا ل دۆر ئەوان شەڕان و شەهید بوونا فەرماندێن پێشمەرگەی دبێژیت: دڤێ رۆژێ دا چەندین پێشمەرگە و فەرماندێن سەربەرز و قەهرەمان دسەنگەرێ بەرگری كرنێدا ژئاخا پیرۆزا كورستانێ و كەرامەتا مللەتێ كورد هاتنە شەهیدكرن, ژوان ژی جەنابێ كاك-وەحید باكۆزی و عومەرێ محەمەد خالد بۆسەلی و كاك سەباح گولی, كو ئەڤ هەرسێ ئەو فەرماندە بوون ئەوێن چو جاران خۆ ژپێشمەرگەی جودا نەدكرن و خۆ ب فەرماندە نەدزانین, بەلكو خۆ ب خزمەتكارێن پێشمەرگەی ددیتن و هەموو گاڤا ئەم ڤێكرابووین, بۆ ڤێ چەندێ ژی دەمێ پێشمەرگە دبینیت بەرپرسێ وی و فەرماندێ وی ل پێشییا وی شەڕی دكەت مورالا وی پێشمەرگەی ژی بەرزتردبیت و پتر بەرگریێ دكەت, خودێ ژهەمیان رازی بیت و جهێ وان ئیشەللا بەهەشت بیت.
كەسایەتیا شەهیدی
فازل میرانی سكرتێری مەكتەبی سیاسی ( پارتی دیموكراتی كوردستان ) ل دور رۆل و كەسایەتی و خەبات و بەرخۆدانا شەهید وەحید باكۆزی، دبێژیت: پارتی حزبا خەباتا نەتەوایەتییە، ئەوێ رۆژا بارزانیێ نەمر ئەڤ حزبە دامەزراندی لسەر درووشم و سیستەمێ خەباتا نەتەوایەتی و دیموكراسیەت و كوردایەتیێ، بەرگریكرن ژڤی سیستەمێ ژلایێ سیاسی و شۆڕەشگێری ڤە شەهیدبوون و قۆربانیدان دڤێت، هیچ مللەتەك رزگارنابیت ئەگەر قۆربانیێ نەدەت، گەلەك قارەمان و ئەندامێن سەركردایەتییێ ژی دڤێ رێ و رێبازێ دا شەهید بووینە، ئەڤ حزبە حزبا شەهیدانە، من شەهید وەحید باكوزی ل سال 1983 یێ ناسكری، ئەوی دەمێ بریندار ببوو هاتبوو بارەگایێ سەركردایەتیێ وەحید كەسەكێ قارەمان بوو، كادرەكێ خودان شیان بوو، كەسەكێ سادەبوو بەلێ گەلەكێ مێرخاس و ب جەرگ بوو، ئەوی ژیانا خۆ هەمی دناڤ كاروانێ خەباتا خۆیا بێ راوەستاندا دەربازكر، ئەو ل دەمەكیدا بوو بەرپرسێ ناو چا برایەتی ل مانگێشكێ هەر كەسەكێ دشیاندا نەبوو بچیتە وی جهی، ژبەر ڤێ مێرخاسیا وی پاشی دبیتە فەرماندێ لەشكری ل لەشكرێ تایبەت، پاشی بوو بەرپرسێ لقێ/17 ل شنگالێ، وەحید هەتا كو تو دبێژی كەسەكێ قەسە خۆش و راستگۆبوو، ب هەمی ژیانەكێ یێ رازی بوو، كەسەك بوو ب هەمی رامانا پەیڤێ شۆڕەشگێربوو، ئەو وەكی هەڤالەكی بوو كەسەكێ خودان توانا و ئاستبەرزبوو، كەسەك بوو دهەموو ئالیەكیدا وی بخۆ خۆ پێگەهاند بوو، كەس ل پشت نەبوو، هەرچەندە ئەو ژ مالباتەكا مەزن و ناڤداربوو، بەلێ وی بخۆ ب ئازادی و ئازایەتی و دلسۆزی و ئیخلاسا خۆ گەهاندبوو وێ بەرپرساتیێ، حەفتیەكێ بەری شەهیدبوونا وی من ل مەكتەب سیاسی ل كۆمبونەكێ دیت، مەباسێ گەلەك تشتا كر، پاشی ل دویف رێكەفتنەكێ مە هندەك شوێن چۆلكرن, شەڤەكێ تەلەفوونا من كر گۆتی ئەز بتنێ یێ مایمە ل بردیا حكمەتا ئیراقێ ژی یێن گەهشتینە زمار – من گۆتێ باشە ل بردیا نەمینە وەرە عێن عوێس یان جهەكێ دی، گۆتی ئەڤ شەڤە دێ ل ڤێرەبم سوبەهی سپێدێ زوی دێ چم، من گۆتێ بەلێ ئەگەر تو سوبەهی نەچی عەسكەر دێ گەهیت و دێ خۆ تووشی شەڕی كەی، چونكە ئەزێ لێ شارەزابووم ئەگەر چار پێشمەرگە ژی دگەل دابن وێرێ بی شەر چۆل ناكەت، رۆژا شەهیدبووی دەمژمێر (11) ی نیڤرۆ بوو ئەز دگەلدا ئاخفتم، جهێ خۆ بۆ من دیاركر، من گۆتێ ب هیچ رەنگەكی دیدارێن تەلەفزیوونی ل وی جهی نەكەی ژبەر كو تو بەرپرسێ لقێی دڤێت تویێ هشیاربی و تە ئاگەه ژخۆ هەبیت، ژبەركو مە زانیاری هەبوون كو ئیراق یا تۆپبارانەكا زۆر توند دكەت، هەر وێ رۆژی پشتی ئەز چویمە ڤە نێزیكی دەمژمێر (2)ی پشتی نیڤرۆ بوو نامەیەك بۆ من هات گۆت وەحید – شەهیدبوو.
فازل میرانی، سكرتێرێ مەكتەبا سیاسی یا پارتا مە (پارتی دیموكراتی كوردستان ) زێدەتر دەربارەی شەهید وەحید باكوزی گۆتی: ب راستی گەر تشتەك ل تە هندا ببیت دێ پێ دلگران بی، بەلێ هەر پێشمەرگەیەك شەهید ببیت، هەر هەڤالەك شەهید ببیت، هەر هاولاتیەكێ مە شەهید ببیت، دڤی وەزعێ نوكە ئەم تێدا، ئەگەر مرۆڤی هەستێ بەر پرسیارەتیێ هەبیت و ئەڤ پێكڤە بەستنە هەبیت ل ناڤبەرا مرۆڤی و مرۆڤی دا، ل ناڤبەرا پێشمەرگەی و پێشمەرگەیدا، مرۆڤ دێ پێ خەمبار و دلگران بیت، ب راستی – وەحید وەكی كورەكێ من یێ وەسا بوو، هەردەم ل ناڤ مالا مەبوو، هەتا كو ئەوێ رۆژا كو وەحید باكوزی تێدا شەهیدبووی كورێت من زۆر بۆ بێ تاقەت ببوون، زۆر خۆش دڤیا، دەمێ ئەز چوویمە مال ئەوێ رۆژێ من نەدڤیا ل ماڵ بێژمە كورێت خۆ، بەلێ وان ب خەمگینی و ب بێ تاقەتیڤە گۆتە من باب ئەڤە وەحید ژی شەهید بوو مە ل شەرێ داعشێ گەلەك شەهیدێن قارەمان دان، ئەم دكۆمبوونەكێدا بووین من گۆتە وان ئەز دێ دەركەڤم ئەز بۆ چەندین شەهیدا یێ چوویمە سەر گۆڕێن وان دڤێت بۆ كورێ خۆژی بچم, ئەگەر موبالغە نەبیت بۆ وەحید ی زێدەتر ژیادگارێ كورێ خۆ دلگران بووم، چونكە ئەوا وەحید باكۆزی بۆ من دكر و بۆ حزبێ دكر یادگارێ كورێ من بۆ من نەكریە، چونكە یادگار گەنجە و تازە یێ پێگەهشتی، دئایندەی ژی دا رەنگە نەشێت، چونكە هەل و مەرج دجیاوازن.
پێشمەرگەیێ شۆرەشا گولانا پێشكەفتنخواز، خورشید باكوزی، ل دور شەهید وەحید باكوزی گۆت: دكاروانێ بەرخودان و خەباتا پیرۆز و رەوایا بزاڤا ئازادیخوازیا گەلێ كوردستانی دا گەلەك لەهنگ و قارەمان و تێكۆشەرێن زانا و هوشیار و خودان شیان و ژێ هاتی رابووینە و ددیرۆكا پرشنگدارا رێبازا كێفەرات و كودایەتیێدا بووینە میناكەكێ دیار و بەرچاڤ و رۆلەكێ مەزن گێراینە دناڤ رۆژانێن سەختێن شۆڕەش و پێشمەرگایەتیێ دا، ژبۆ ب دەستڤەئینانا ئارمانج و دروشم و شەنگستەیێن سەرخستنا دۆزا گەلێ خۆ یا پیرۆز و رەوا، هەردەم خزمەتكرینە و جانێ خۆ كرینە قوربان دا كو گەلێ وی ب ئازادی و سەرفەراز بژیت، رۆپەلێن دیرۆكەكا پر شانازی و سەرفەرازی بۆ گەلێ خۆیێ پەڕیشان و ستەمدیدە ب خوینا جانێ خۆ تۆماركرینە، یەك ژ ڤان تێكوشەر و قارەمانێن پر ب جەرگ و ب جەسارەت، یێ زانا و هوشیار و پێگەهشتی یێ كۆ هەموو مللەتێ كورد و دیرۆكا پر سەروەریا كوردستانێ شاهدەیێ بۆ مێرخاسی و مێرانیا وی ددەت، یێ كو بهاترین و مەزنترین باوەرنامە و خەلاتێ سەروەریێ و سەربەرزی و روومەتێ وەرگرتی. شەهیدێ سەركردە كاك (وەحید باكۆزی) بوویە، كو هەموو ژیانا خۆ سەخمەراتی ئازادی و سەربەخۆ یا گەلێ خۆ تەرخانكربوو… یا هەژییە بێژین كۆ سەمبولا بەرخودان و سەروەری و فیداكاریێ، هەڤرێبازێ پارتی و بارزانی و كوردایەتیێ.
