دێ بمە دەنگێ ب هێز یێ گەنجان
ئامێدیێ، مەحمود نهێلی:
كەلحێ محەمەد كەلحێ رێكانی، بەربژارێ هەژمار 39 سەر ب لیستا 190 یا پارتی دیموكراتی كوردستان بۆ رۆژناما ئەڤرۆ دیار كر خزمەتكرنا كوردستانێ و دەڤەرا بەهدینان دێ ئەركێ مە یێ سەرەكی بیت، و گۆت: خزمەتكرنا سنوورێ ئەز لێ هاتیمە بەربژار كرن و دەڤەرا مە دێ دو جاران ئەركێ من بیت كو ئەز خزمەتا خەلكێ خوە ل ڤێ دەڤەرێ بكەم.
ناڤهاتی دیار كر، ل سەر ئاستێ خزمەتا مالباتێ ژی وەكو یا دیار چ جاران ژ خەلكێ خوە نەڤەقەتیاینە، و گۆت: هندی شیاین بەژداربووینە د خوەشی و نەخوەشیێن خەلكێ خوە دا بێ جوداهی و ژ هەموو تەخ و چینێن جڤاكی.
ناڤهاتی زێدتر گۆت: ئەز دێ ل سەر هەمان رێبازا خزمەتكرنێ یێ بەردەوام بم و دێ بمە دەنگەكێ ب هێز یێ گەنجان، ب تایبەتی تەخا گەنجێن خودان شیان كو ئەو هێز و پاشەرۆژا مللەتێ مەنە و پاشەرۆژ دێ ب دەستێ گەنجان ئاڤا بیت.
بەربژار كەلحێ محەمەد كەلحێ رێكانی هیڤی ژی خواستن كو بشێت باوەریا خەلكێ خوە ب دەست ڤە بینیت، داكو ببیە نوونەرێ دەنگێ ب هێز ل پەرلەمانی.
كەلحێ محەمەد كەلحێ رێكانی، كورێ كەسایەتیێ بەرنیاس یێ كوردستانێ و پارێزگەها دهۆكێ محەمەد كەلحێ ئاغایێ رێكانی یە، ل سالا ١٩٦٦ هاتیە سەر دونیایێ، شەهرەزایی د وارێ ئابۆری و كاروبارێن كۆمەلایەتی دا هەیە، ئەندامێ ژۆرا بازرگانی تایێ دهۆكێ یە، ناڤهاتی هەرسێ زمانێن كوردی و عەرەبی و ئینگلیزی ب باشی دزانیت.
كەلحێ رێكانی، هەر ژ زارۆكینیێ د خێزانەكێ دا رابوویە كو سێهوانا چارەسەركرنا كێشە و موسیبەتێن خەلكێ دەڤەرێ بوویە، هەموو دەمەكی د ناڤا خوەشی و نەخوەشیێن خەلكێ خوە دا د بەرهەڤ و ئامادەبووینە. ب درێژاهیا ژیێ خوە ئەڤ مالباتە بووینە سۆمبولێن ئاشتیا كۆمەلاتی و ب هزاران سولح ل سەر دەستێ وان هاتینە ئەنجامدان.
