ئالیێن سیاسی یێن هەرێما كوردستانێ دەرگەهـ بۆ بەغدا ڤەكر دەستێوەردانێ د هەرێمێ دا بكەت
سەرۆكێ حوكمەتا هەرێما كوردستانێ راگەهاند، ئالیێن سیاسی یێن هەرێما كوردستانێ دەرگەهـ بۆ بەغدا ڤەكر دەستێوەردانێ د هەرێمێدا بكەت و گۆت: ئەڤە دژی سیستەمێ فیدرالییە.
مەسرور بارزانی، سەرۆكێ حوكمەتا هەرێما كوردستانێ ل گەل هەژمارەكا هەڤوەلاتییان ل كەلها هەولێرێ گەنگەشەكر و بەرسڤا پرسیاران دا. د وێ گەنگەشێ دا گەلەك بابەتێن گشتی یێن گرێدای ب هەولێرێ و رەوشا هەرێما كوردستانێ و هەلبژارتنێن پەرلەمانێ كوردستانێ هاتنە باسكرن.
د بەرسڤا پرسیارەكا قوتابییەكێ زانكۆیێ ل دۆر گرفتا هاتنوچوونێ و كێشەیا ئاڤێ، سەرۆكێ حوكمەتا هەرێما كوردستانێ ئاماژەكر» نوكە حوكمەتا هەرێما كوردستانێ كار ل سەر سیستەمەكێ ڤەگوهاستنا گشتی دكەت».
سەبارەت پرسا سۆلینان و دروستبوونا لەهییان ل هەولێرێ، مەسرور بارزانی گۆت» پشتی لەهییا هەولێرێ مە پێرابوونێن باش یێن وەرگرتین بۆ رێگریكرنێ ل لەهییان».
ل دۆر كێشەیا كێمئاڤیێ ژی دیاركر كو بكارئینانا ئاڤا ژێرئەرد كێشەیا كێمئاڤیێ ل هەولێرێ چارەسەر ناكەت و خویاكر كو د دەمەكێ نێزیكدا پڕۆژەیێ هاوارهاتنا ئاڤێ بۆ هەولێرێ دێ ب دوماهی هێت.
پڕۆژەیێن حوكمەتێ
سەبارەت پرسا سەقامگیریێ و پڕۆژەیێن حوكمەتا هەرێمێ و بابەتێ دارایی، مەسرور بارزانی ئاماژە ب وێ چەندێ كر» هەرێما كوردستانێ پترییا بەهانەیێن حوكمەتا فیدرالی نەهێلاینە و كارێ جدی یێ هاتییە كرن بۆ وێ چەندێ مافێن هەرێما كوردستانێ بهێنە جهگیركرن، د سالێن داهاتی ژی دا ئەنجامێن كار و بەرنامەیێن حوكمەتێ دێ زێدەتر دیار بن».
هەروەسا گۆت» هیڤیدارم دەڤەر بەر ب سەقامگیریێ بچیت، بۆ وێ چەندێ ئاستەنگ و قەیران دوبارە كارێ مە یێ ئاڤەدانیێ سست نەكەن».
«د بزاڤێ داینە كارەبا بەردەوام دابین بكەین»
د بەرسڤا پرسیارەكا هەڤوەلاتییەكیدا مەسرور بارزانی گۆت» بهایێ كارەبێ و ئاڤێ ل سەر هەڤوەلاتیان نەهاتییە زێدەكرن، هەروەسا ژ بەر زێدەبوونا پێدڤییا هەڤوەلاتییان ئەم نەشیاینە كارەبا 24 ساتی دابین بكەین، د دەمەكیدا بهایێ كارەبا موەلیدان گەلەك ژ كارەبا حكومی گرانترە، ئەم د بزاڤان داینە كارەبا بەردەوام دابین بكەین و نوكە ل چەند تاخێن هەولێرێ چوویە د وارێ بجهئینانێدا».
ژ 2013 و هێرڤە دامەزراندن ل هەرێما كوردستانێ هاتیە راوەستاندن
د بەرسڤا پرسیارەكێدا بۆچی ل ئیراقێ دامەزراندن یا بەردەوامە و ل هەرێما كوردستانێ راوەستییایە، یان ژی بۆچی وەكو هەرێمەكا فیدرالی بەهر د وێ رێژەیا دامەزراندنێ ل ئیراقێ نینە؟ سەرۆكێ حوكمەتا هەرێما كوردستانێ گۆت» پێشتر و ژ ئەگەرێ ململانێیا حزبی گەلەك كەس هاتینە دامەزراندن و نوكە داهاتێ هەرێما كوردستانێ هند نینە تاكو خەلكێ نوو بهێتە دامەزراندن، د ئەڤ سالەدا ئیراقێ ئێك ملیۆن كەس دامەزراندن».
هەروەسا راگەهاند» نابیت هەرێما كوردستانێ بهێتە بێ بەهركرن ژ رێژەیا دامەزراندنێ ل ئیراقێ، چونكە پێدڤی بوو هەرێما كوردستانێ وەكو قەوارەیەكێ فیدرالی بودجە بۆ بهێتە دیاركرن، بۆ ڤەكرنا دەرگەهێ دامەزراندنێ، ئەم د دانوستاندنان داینە ل گەل بەغدا».
ژ ئالییەكی دیڤە دیاركر كو ئالیێن سیاسی یێن هەرێما كوردستانێ دەرگەه بۆ بەغدا ڤەكر دەستێوەردانێ د هەرێما كوردستانێدا بكەت و گۆت» نابیت وەزارەتەكا ئیراقی دەستێوەردانێ د كاروبارێن هەرێمەكێدا بكەت و ئەڤە دژی سیستەمێ فیدرالییە».
هەلبژارتن و رێژەیا پشكداریێ
د پشكەكا دی یا گەنگەشێدا مەسرور بارزانی د بەرسڤا پرسیارەكێدا ل دۆر بلندی و نزمییا پشكداریێ و كاریگەرییا دەنگێن هەڤوەلاتییان ئاماژە ب كۆمەكا بابەتان كر و گۆت» دبیت رەوتەكێ سیاسی هۆكار بیت بۆ بێئومێدییا خەلكی ژ دەنگدانێ، هیڤیدارم د ڤان هەلبژارتناندا رێژەیا پشكدارییا هەڤوەلاتییان زێدەتر بیت، چونكە گەلەك یا گرنگە هەڤوەلاتی دەنگ و رەنگێ خوە د رۆژا هەلبژارتناندا دیار بكەن و داخوازا مە ژ هەموو هەڤوەلاتییان ئەوە پشكدارییەكا كارا د هەلبژارتناندا بكەن، چونكە ئەنجامێن هەلبژارتنان دێ كاریگەری ل سەر پاشەڕۆژا هەڤوەلاتییان هەبیت».
«گەلەك یا گرنگە وەلاتێن جیهانێ كارگەهان ل هەرێما كوردستانێ ڤەكەن»
بۆ ڤەژاندنا كەرتێن جودا جودا، مەسرور بارزانی، سەرۆكێ حوكمەتا هەرێما كوردستانێ ب گرنگ دزانیت كارگەهێن هەمەجۆر و پێشكەفتی یێن وەلاتێن جیهانێ لق ل هەرێما كوردستانێ هەبن، چونكە ئەو چەندە ژ گەلەك روویان ڤە د مفایێ كوردستانێ دایە هەروەسا ئەو پێنگاڤە ل گەل سیاسەتا حوكمەتا هەرێمێ ژی یا گونجایە كو پێك دهێت ژ هەمەجۆركرنا داهاتی و گۆت ژی» سەرەرای قەیران و دژایەتییان، حوكمەتا هەرێمێ یا ل سەر پێیێن خوە راوەستییای و راگرتنا بودجەی ئاستەنگ بوو بۆ بجهئینانا بەرنامەیێن حوكمەتێ».
دەستێوەردانێن حزبی د پارێزگەهاندا
سەرۆكێ حوكمەتا هەرێما كوردستانێ ئەوژی بەرچاڤكر كو ژ پێخەمەت ئاسانكاریێن زێدەتر و خزمەتا هەڤوەلاتییان، مە دەستهەلات دایە پارێزگەهان، چونكە ل دوماهیێ دەستهەلاتا خۆمال و پارێزگا بەرپرسە ژ بجهئینانا وان پڕۆژەیێن حوكمەتێ بڕیارێ ل دۆر ددەت، ژ بەر وێ چەندێ پڕۆژەیێن حوكمەتێ بۆ هەموو پارێزگەهانە نەكو باژێرەكێ جودا و تایبەت.
هەر سەبارەت دەستێوەردانێن حزبی د پارێزگەهاندا، سەرۆكێ حوكمەتا هەرێمێ نموونەیا پارێزگەها سلێمانیێ ئینا و گۆت» دەستهەلاتا حزبی هەبوو ل سلێمانیێ رێك نەدایە ئیدارەیا پارێزگەهێ پڕۆژەیان بجهبینیت».
د بەرسڤا پرسیارەكێدا ل دۆر بانگەشەیا هەلبژارتنان و پێكڤەژیانێ، مەسرور بارزانی گۆت» هەرێما كوردستانێ ب لاندكا پێكڤەژیانێ یا ناڤدارە و شانازیێ ب وێ چەندێ دكەت و مە ل دەستپێكێ داخوازا بانگەشەیەكا ئارام ژ هەموو ئالییان یا كری و هەر حزب و ئالییەكێ ب زمانەكێ زڤر بانگەشەیێ بكەت دەربڕینێ ژ خوە دكەت».
پەیوەندیێن هەرێما كوردستانێ و ئیراقێ
مەسرور بارزانی باسێ پشكەك ژ گرفتێن هەرێما كوردستانێ و ئیراقێ كر و ئاماژە كر كو گەلەك كەس ل بەغدا یێن هەین هێشتا باوەری ب فیدرالییەتێ نینە، هەروەسا هزرا مەركەزیكرنا حوكمڕانیێ دێ كێشە ژێ پەیدا بن و گۆت ژی» مە پەیوەندییەكا باش ل گەل سەرۆك وەزیرێن ئیراقێ یا هەی و مە نییازا وێ چەندێ یا هەی ل گەل بەغدا چارەسەرییا كێشەیان بكەین و هەرێما كوردستانێ ئەركێن خوە ل بەرامبەر ئیراقێ یێن بجهئیناین».
«بەنداڤێن مەزنتر ل هەرێما كوردستانێ دێ دروست كەین»
د وێ گەنگەشێدا پرسیار ل دۆر بەنداڤان، ژینگەهێ و پاراستنا وێ هاتە كرن و تێدا سەرۆكێ حوكمەتا هەرێما كوردستانێ ئاماژە كر» د بەرنامەیێ مە دایە بەنداڤێن مەزنتر ل هەرێما كوردستانێ دروست بكەین» هەروەسا دوپاتی ل پاراستنا ژینگەهێ كر و گۆت» ل پارزینگەهێن ئیراقێ غاز ب هەدەر دچیت و ل كوردستانێ مفا ژێ دهێتە وەرگرتن و مە بەرنامەیێن گونجای بۆ ریسایكلین و ب كاربرنا پاشمایان و گلێشی یێن هەی» ل دوماهییا وی بڕگەیێ ژی باس ل وێ چەندێ كر» ژینگەهپارێزی تنێ ب حوكمەتێ ناهێتە كرن و پێدڤییە هەڤوەلاتی د هاریكار بن».
ئێكەتی و كورسیێن كۆتایان
سەبارەت پێكهاتەیان و بڕیارا دادگەها فیدرالی بۆ نەهێلانا 11 كورسیێن كۆتایا، مەسرور بارزانی، سەرۆكێ حوكمەتا هەرێمێ گۆت» ئێكەتیێ ل دادگەها فیدرالی سكالا بۆ نەهێلانا كۆتایا پێكهاتەیان تۆماركر و شانازیێ ژی ب وێ چەندێ دكەت كو كورسیێن كۆتایا پێكهاتەیان نەهێلاینە» هەروەسا دیاركر» نەهێلانا كورسیێن كۆتایا پێكهاتەیان كارەكێ شاش بوو».
مەسرور بارزانی رۆهنكرنەك ل دۆر پەیوەندییا پارتی ل گەل پێكهاتەیان دا و گۆت» باوەرییا پارتی ب مافێ پێكهاتەیان وەكریە ئەو ببنە هەڤپەیمانێن پارتی و دڤێت پارتی شانازیێ ب وێ چەندێ بكەت، كو بوویە جهێ باوەرییا پێكهاتەیان و لادانا كورسیێن كۆتایا پێكهاتەیان لێدان بوو ل مافێن پێكهاتەیان. نابیت ژ بەر هۆكارێن سیاسی مافێ پێكهاتەیان بهێتە پێشێلكرن و ب پێداگیرییا پارتی دیموكراتی كوردستان پێنج كورسیێن كۆتایا پێكهاتەیان زڤرین».
هەروەسا راگەهاند» د شیاندایە ل پەرلەمانێ كوردستانێ یێ داهاتی ئەو شاشییا ل بەرامبەر پێكهاتەیان هاتییە كرن بهێتە راستڤەكرن».
