بەرێ بنیاتی بۆ هۆلا كۆنفرانسان ل زاخۆ هاتـە دانان
زاخۆ، دلۆڤان هالۆ:
دوهی 13/10/2024 بەرێ بنیاتێ بۆ هۆلا كۆنفڕانسان و هۆلا پێشانگەهێن نێڤدەولەتی ل ئیدارەیا سەربخوە یا زاخۆ هاتە دانان.
گۆهدار شێخۆ، سەرپەرشتێ ئیدارەیا سەربخوە یا زاخۆ، د كۆنگرەیەكێ ڕۆژنامەڤانی دا گۆت: «مە بەرێ بنیاتێ پڕۆژەیەكێ گرنگ و ستراتیژی، كو هۆلا كۆنفڕانسانە ل ئیدارەیا سەربخوە یا زاخۆ دانا، ئەڤ پڕۆژە بۆ مە وەكو خەونەكێ بوو، من دڤیا تشتەكێ ب ڤی شێوەیی ل زاخۆ دروست بكەین و ئەو پڕۆژەیێن ل زاخۆ هاتینە ئەنجامدان ل گەل ڤی پرۆژەیی تەمام ببن».
گۆتژی: «ل تەنشت هۆلا كۆنفڕانسان، بەرێ بنیاتێ پڕۆژەیەكێ دی یێ گرنگ و ستڕاتیژی هاتە دانان، كو ئەو ژی دروستكرنا هۆلا پێشانگەهێن نێڤدەولەتی یە ژ بۆ مەرەما ڤەكرنا پێشانگەهێن بیاڤێ گەشتوگوزارێ و چاندنێ و پرتووكان، مە ب فەر دیت ئەڤ پڕۆژە ل زاخۆ هەبیت، چونكی زاخۆ باژێڕەكە هاتنوچوون و لێكگوهارتنا بازرگانی یا زۆر د ناڤبەرا هەردو وەلاتێن توركیا و ئیراقێ دا هەیە».
گوهداری زێدەتر گۆت: «ئارمانجا سەرەكی ژ ڤان هەردو پڕۆژەیان ئەوە، ئەم بشێین ئەو كۆنفڕانسێن ئابووری و پیشەسازی و پێشانگەهێن هەمەجۆر ل ئیراق و هەرێما كوردستانێ دهێنە كرن بینینە زاخۆ».
