بەرێ بنیاتی بۆ چەندین پڕۆژەیان ل ئاكرێ هاتە دانان و هندەك ژی هاتنە ڤەكرن
لەزگین جوقی:
ب ئامادەبوونا د. سامان بەرزنجی، وەزێری ساخلەمیێ ل حوكمەتا هەرێما كوردستانێ و د. عەلی تەتەر، پارێزگاری دهۆكێ و د. دلاوەر بوزۆ، دەڤەردارێ ئاكرێ و د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ، دوهی 13/10/2024 چەندین پڕۆژەیێن ساخلەمیێ ل دەڤەرداریا ئاكرێ هاتنە ڤەكرن و بەرێ بنیاتی بۆ هندەكێن دێ هاتە دانان.
د. سامان بەررزنجی، وەزێری ساخلەمیێ دیاركر، ئەڤرۆ ل ئاكرێ چەندین پڕۆژەیێن ساخلەمیێ هاتنە ڤەكرن و بەرێ بنیاتی بۆ چەندین پڕۆژەیێن دی هاتە دانان، ژ وان پڕۆژەیێن هاتینە ڤەكرن: پڕۆژەیێ سەنتەرێ شووشتنا گولچیسكا و بەرفرەهكرنا پشكا زارۆكان ل نەخۆشخانا زارۆكان و زارۆكبوونێ ل ئاكرێ و ڤەكرنا سەنتەرێ تالاسیمیایێ، كو پتری 200 نەخۆشان دێ مفای ژێ وەرگرن و بنگەهێ ساخلەمیێ ل دینارتێ هاتنە ڤەكرن و گۆت: «حكومەتا هەرێما كوردستانێ گەلەك گرنگیێ ب كەرتێ ساخلەمیێ ددەت، د پلانێ دایە پڕۆژەیێن باشتر بۆ پتر خزمەتكرنا خەلكی بهێنە چێكرن».
د. عەلی تەتەر، پارێزگارێ دهۆكێ راگەهاند، ئەڤ پڕۆژە ژ لایێ حكومەتا هەرێما كوردستانێ ڤە هاتینە چێكرن و گۆت: «مەرەم ژێ ئەوە خەلك ل دەڤەرێن خۆ خزمەتێن ساخلەمیێ وەربگرن و هەمی خزمەتێن ساخلەمیێ ل ئاكرێ بۆ وەلاتیان بهێنە دابینكرن».
سەربەست ئاكرەیی، رێڤەبەرێ ناوچەداریا دینارتێ دیار كر، بنگەهێ ساخلەمیا دینارتێ ب گوژمێ ملیارەك و پتری 200 ملیۆن دیناران هاتیە ئاڤاكرن هەموو خزمەتێن ساخلەمیێ د ناڤ دانە، وەكو: تێشك و هولا زارۆكبوونێ و دەرمانخانە و تەختێن نڤاندنێ بۆ نەخۆشان.
