ئینانا ژنا دووێ زێدەگاڤیەكا مەزنە ل سەر مافێن هەڤژینا ئێكێ
هەرهین محەمەد:
دەمێ ژن رازی دبیت زەلامێ وێ ژنەكا دی بینیت، ئەڤجا ژبەر چ ئەگەر بیت ئێكەم مەرجێ وێ ئەوە هەویا خۆ نەبینیت و جودا د خانیەكێ ڤە بژیت، دەروونناسەك ژی دبێژیت: هەكە زەلام ب دزیڤە ژنا دویێ بینیت و ژنا ئێكێ ئاگەهدار نەكەت ل وی دەمی ئەو چەندە زێدەگاڤیەكا مەزنە ل سەر مافێن هەڤژینا ئێكێ و پێشیلكرنا مافێن وێ یە.
ڤەکۆلەرێ جڤاکی هیوا کامیران دیارکر، د قانوونا جڤاكی دا ژنا ئێكی یا نەچار نینە ل گەل ژنا دووێ بژیت و پتریا جاران ژنا ئیكێ دهێتە جودا كرن ژ ژنا دووێ و گەلەك جاران ژی داخوازیا ئەوان ئەوە ژ ئێكدو د جودا بن، باشترە دەمێ زەلام ژنا دووێ دئینیت دڤێت ب رەزامەندیا ژنا ئیكێ بیت، چونكی ئەو رەفتار دناڤ جڤاكی دا هەیە ژنەك دێ هەڤژینیێ ل گەل زەلامەكێ ب هەڤژین پێك ئینیت ژ كەربێن هەڤژینا وی یا ئێكێ دا، یان زەلام دێ هەڤژینەكا دی بخو ئینیت ژ كەربێن هەڤژینا خودا و گۆت: ب دیتنا من ئەڤە رەفتارەكا خەلەتە و زەلام ب پلەیا ئێكێ یێ خەلەتە و پلەیا دووێ هەڤژینا دووێ یە.
ژلایێ دەروونیڤە، دەروونناس ئیسماعیل عەبدوللا گۆت: هەكە زەلام ب دزیڤە هەڤژینیێ پێك بینیت و هەڤژینا ئێكێ ئاگەهدار نەكەت ل وی دەمی ئەو چەندە زێدەگاڤیەكا مەزنە ل سەر مافێن هەڤژینا ئێكێ و پێشیلكرنا مافێن ژنا ئێكێ یە و دبیتە خیانەت ژی، ژبەركو ژلایێ یاسایی ڤە ئەوێ ژنێ ژی مافێن خۆ هەنە و دڤێت بژیت و ب مافێ خۆ یێ خێزانداریێ یا شاد بیت و ل گەل هەڤژینێ خۆ بژیت.
ئیسماعیل دیار كر كو زور جاران زەلام ژبەر هندەك ئاریشەیان ژنا دووێ دئینیت، ئەڤجا چ ئەو ئاریشە ژ نەبوونا زارۆكان بیت، یان هەڤژینا ئێكێ یا نەخوش بیت ل وی دەمی ل دووڤ كاودانێن زەلامی دمینیت كا دێ هەردوو هەڤژینان د ئێك خانی ڤە ئاكنجی كەت، یان دێ د دوو خانیێن جوداڤە ئاكنجی كەت و گۆت: ئەو چەندە د مینیتە ل سەر خوڕاگریا ژنێ و بارودوخێ وێ یێ تایبەت و دەروونی كا دێ چەند شێت خۆ ل بەر گریت.
