هێمن هەورامی: پارتی د ڤان هەلبژارتنان دا 230 هزار دەنگێن خوە زێدەكرن
بەرپرسێ مەكتەبا رێكخستنا پارتی دیموكراتی كوردستان راگەهاند: د ڤان هەلبژارتناندا پارتی ریكۆردی شكاند و شییا809 هزار دەنگان ب دەستڤەبینیت، هەروەسا دیاركر، پارتی خودان دیرۆك و جوگرافییایەكا بەرفرهەیا كوردستانێیە و كابینەیا دەهێ دێ هەر ب سەرۆكایەتییا مەسرور بارزانی بیت.
هێمن هەورامی، بەرپرسێ مەكتەبا رێكخستنا پارتی دیموكراتی كوردستان گۆت» ئەنجامێن هەلبژارتنان بۆ پارتی سۆپرایز نەبوو، چونكە پارتی ژ رەهەندێ باوەریبوون ب رێباز و پشتبەستن ب بنگەهێ خوە یێ جەماوەری، باوەری هەبوو دێ وی ئەنجامی ب دەستڤەئینیت».
هێمن هەورامی ئاماژەكر» پارتی د ڤان هەلبژارتناندا شییا 809 هزار دەنگان ب دەستڤەبینیت، د دەمەكیدا د هەلبژارتنێن بۆری دەنگێن كێمتر ئینابوون و ڤێجارێ پارتی 230 هزار دەنگ یێن زێدەكرین».
خویاكر ژی» سەرەرای هەموو بزاڤێن ئالییان بۆ روو ب رووبوونا سەركەفتنێن پارتی دیموكراتی كوردستان، بەلێ پارتی سەركەفتنەكا مەزن ب دەستڤەئینا».
رۆناهی ئێخستە سەر وێ چەندێ ژی» پارتی خودان دیرۆك و جوگرافییایەكا بەرفرهەیا كوردستانییە و كابینەیا دەهێ هەر ب سەرۆكایەتییا مەسرور بارزانی، سەرۆكێ حوكمەتا هەرێما كوردستانێ بیت».
هێمن هەورامی پتر گۆت» پارتی ل سنۆرێن سلێمانیێ و هەلەبجە نێزیكی 9 هزار دەنگ هەمبەركرن ل گەل هەلبژارتنێن بۆری یێن زێدەكرین، كو پشكەكا ڤێ زێدەبوونێ ژی، بۆ كار و چالاكی و پڕۆژەیێن مەسرور بارزانی، سەرۆكێ حوكمەتا هەرێما كوردستانێ بۆ خزمەتكرنا ڤان سنۆران، دزڤریت «.
بەرپرسێ مەكتەبا رێكخستنا پارتی دوپاتكر ژی» بۆ پێكئینانا كابیەیا داهاتییا حوكمەتا هەرێما كوردستانێ، پارتی دێ دەرگەهێ بۆ هەموو ئالییەكی ڤەكەت و مەبەستا پارتی هەموو پشكداریێ د حوكمەتێدا بكەن و پێكڤە كوردستانێ زێدەتر سەقامگیر و ئاڤەدانتر بكەن».
