كه‌ڤال پێدڤی ب شرۆڤه‌كرنێ نینه ئه‌و بخوه دئاخڤیت
هه‌رهین:
هونه‌رمه‌ندێ شێوه‌كار شێرزاد شاهین، د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ دبێژیت: هونه‌رێ شێوه‌كاری هونه‌ره‌كێ بێده‌نگ و جوانه و ب ره‌نگ وسیفه‌تێن خوه ده‌ربرینێ دكه‌ت، ئانكو ئه‌و بخوه دئاخڤیت بێ كو شێوه‌كار بۆ كه‌سێ به‌رامبه‌ر شروڤه‌كه‌ت و پتریا كه‌ڤالێن من ده‌ربرینێ ژ سرۆشتی دكه‌ن، ژبه‌ركو ره‌نگێن سرۆشتی هه‌موو جوان و دلڤه‌كه‌رن و بۆ چاڤێن بینه‌ری ژی گه‌له‌ك دخۆشن و هه‌ركه‌ڤاله‌كی ده‌مێ خوه یێ هه‌ی كا چه‌ند ل سه‌ر كاردكه‌م هندی قه‌بارێ كه‌ڤالی یێ مه‌زن بیت پتر ده‌م بۆ دڤێت.
ئه‌وچه‌نده‌ژی گۆت: هه‌رشێوه‌كاره‌كی شێوازێ خوه یێ تایبه‌ت هه‌یه و ل سه‌ر دچیت و من ژی شێوازێ خوه یێ تایبه‌ت هه‌یه و هه‌رتشته‌كێ جوان دناڤ سرۆشتی دا، یان جهه‌كێ جوان ببینم وێنه‌كی بۆ دگرم و پاشی دكه‌مه كه‌ڤال و دی گه‌له‌ك یا جوان بیت ژی هه‌كه جڤاكێ مه ئه‌و ره‌وشه‌نبیریه ل نك هه‌بیت كه‌ڤالێن خومالی دمالێن خوه ڤه ب هه‌لاویسن و ب ئه‌وێ چه‌ندێ دێ پتر كه‌ڤال و شێوه‌كار بهاكه‌ڤن و ئه‌وژی دێ بهایێ خوه زانیت و دبیت ئه‌و كاره بۆ ئه‌وی شێوه‌كاری بیته پیشه، به‌لێ ب مخابنی ڤه ل كوردستانێ ب گشتی هونه‌رێ شێوه‌كاری نه‌بوویه پیشه، به‌لێ ل ئه‌ڤێ دووماهیێ هنده‌ك شێوه‌كاران بخوه ب رێیا سوشیال میدیایێ كاركر، به‌لێ هێشتا ئه‌ڤه یا كێمه و ئه‌و داهاتێ بۆ دهێت ژی تێرا خه‌رجیێن وی ناكه‌ت كو ژیانا خوه پێ ده‌ربازبكه‌ت.
