ناساندنا ته‌مبورێ بۆ خه‌لكێ جیهانێ بۆ كوردان گه‌له‌ك گرنگیا خوه هه‌یه
زنار تۆڤى:
فه‌رید ئیلهامى، لیده‌رێ ئامیرێ سازێیه و سترانان ژى دبێژیت و هه‌روه‌سا د بیاڤێ سینه‌مایێ دا ده‌رهێنه‌رێ دكیۆمێنتیارییایه، د دیداره‌كێ دا بۆ رۆژناما ئه‌ڤرۆ دبێژیت:
ئه‌ز نه‌ڤیێ بیستێ یێ میراتگرێن سازا یارسانم و ژ نه‌ڤیێن سولتان ئیسحاقێ دامه‌زرینه‌رێ ئایینێ یارسانم، ب شێوه‌كێ سروشتى و هه‌ر ژ زارۆكاتییێ دا ته‌مبوور دناڤا خێزانا مه‌دا هه‌ر هه‌بوویه و ل وێرێ ئاشنایى وى ئامیرى بوویمه، ل وى ده‌مى باپیرێ من، سه‌ید ئه‌یاز، هێشتا د ژیانێ دابوو، سه‌ید ئه‌یاز ئێكبوو ژ جه‌مسه‌ر و مه‌زنێن ئایینێ یارسان و ئێكبوو ژ ده‌نگبێژ و موزیكژه‌نێن مه‌قامێ ل كرماشانێ، من ژ زارۆكاتییا خۆ خواندنا سه‌ره‌تایى یا موزیكێ لده‌ف وى خواندیه و ل ژییێ شه‌ش سالییێ، ب هاندانا دایكا خۆ، من سازا سێ تار ب شێوه‌كى ئه‌كادیمى لده‌ف كورێن مامێن خۆ خواندیه. بنه‌مالا دایكا من و خالێن من ژ ئێكه‌مێن دامه‌زرینه‌رێن گرووپێ ته‌مبورژه‌نێن كوردستانێ بوون، ئانكو ده‌سته‌یا ته‌مبورژه‌نێن سه‌حنه، بوون.
ناڤهاتى گۆت ژى: سه‌حنه دكه‌ڤیته رۆژهه‌لاتێ پارێزگه‌ها كرماشان و ب باژێرێ ته‌مبور و باژێرێ سه‌ید خه‌لیل عالى نه‌ژاد و باژێڕ یارسان و پایته‌ختێ یارسانیان دهێته نیاسین، ئێكه‌مین ده‌سته‌یا ته‌مبورژه‌نێن ل ڤان پێنجى سالێن بورى ل سه‌حنه‌یا كرماشان هاتیه دامه‌زراندن، ل وى ده‌مى سه‌ید ئه‌مرولا شاه ئیبراهیم دامه‌زرێنه‌رێ ئێكه‌مین ده‌سته‌یا ته‌مبورژه‌نێن سه‌حنه بوو، ب هه‌لكه‌فتا فه‌رهه‌نگییا شیراز و ئیسفه‌هانێدا ئێكه‌مین كۆنسێرتا فه‌رمى گێرایه، هه‌روه‌سا زۆرترین ئاكنجیێن سه‌حنه كورد و یارسانن و ل سه‌حنه چه‌ندین جهێن پیرۆز هه‌نه، پرانیا خه‌لكێ باژێرێ سه‌حنه ب پایته‌ختێ یارسانێن جیهانى ددانن،
هه‌روه‌سا پترى 30 سالایه، مۆزیكێ دژه‌نم و د ڤى كارێ مه‌زندا ئه‌ز خۆ ب قه‌ردارێ ئایینێ ره‌سه‌نێ یارى و بنه‌مالا خۆ ددانم و زۆر یێ خۆشحالم كو شیایمه درێژه‌پده‌رێ رێیا باب و باپیر و میراتگرێ ئه‌وێ سازێ بم.
ئه‌و چه‌ند ژى گۆت: ته‌مبور كه‌ڤنترین سازه ل جیهانێ و زۆرترین سازا زیهى كو ل جیهانێدا هه‌نه زارۆیێن ته‌مبورێنه، له‌وما ناساندنا ته‌مبورێ بۆ خه‌لكێ جیهانێ بۆ كوردان گرنگیه‌كا زۆر هه‌یه، ته‌مبورێ سێ سیم و چارده په‌رده هه‌نه و ئه‌و سازه ره‌سه‌ناتیه‌كا كوردان تێدا دیاره، ل سالێن بورى، ژ پێخه‌مه‌تى پاراستن و تۆماركرنا ئه‌وان سازان، نێزیكى هه‌موو مه‌قامێن ته‌مبورێ ل ده‌ڤه‌رێن جودا من كۆمكرینه و من ئه‌لبۆمه‌ك ب ناڤێ «هزار ته‌مبور» د ئاسته‌ێ زۆر سنوردار و كێم دیتندا دروست كرییه، هه‌روه‌سا كتێبه‌ك ب وى ناڤى، كو تێدا ته‌مبور و پارتێن ته‌مبورێ و داستانێن په‌یوه‌ندیدار ب وێ سازا ئایینێ پیرۆز تێدایه، من نڤیسایه.
فه‌رید هێشتا دبێژیت: به‌رى هه‌ژده سالان، من دكیۆمێنتیارییه‌ك چێكربوو، هه‌ر ئه‌و ڤه‌كۆلینه و هه‌ڤالینى ل گه‌ل دۆستێن د وى بیاڤى دا بوونه ئه‌گه‌ر ئه‌ز بشێم بچمه ناڤ جیهانا سینه‌مایێ دا، ئه‌ز خۆ ب قه‌ردارێ مامۆستایێ مه‌زن و خۆشتڤى كاك مه‌هدى ئه‌سه‌دى دزانم، كو پتر ژ چار سالان ل گه‌ل وى ئه‌ز فێربووم و من باوه‌رى بخۆ هه‌بوو، دیسان خواندنا من هه‌تا قووناغا ماسته‌رێ ژى هه‌ر د وارێ موزیكێ دا بوو، هه‌روه‌سا د وارێ سینه‌مایى و دكیۆمێنتكرنا موزیكى دا پتر ژ پازده كاران و ده‌رهێنان و دروستكرنا پتر ژ 800 ده‌مژمێرێن فلمان ل ده‌ڤه‌رێن جودا یێن كوردستانێ من كرینه، د ڤى بیاڤى دا پتر ژ شه‌ش خه‌لاتێن جیهانى من وه‌رگرتینه و د چه‌ندین فیستیڤالێن نێڤده‌وله‌تیدا ب فلمێ وه‌ك «ژه‌نیارێن چیایێن پیرۆز یێن ته‌میره و زاگرۆس» پشكدار بوویمه، ئه‌ڤه سێ ساله ل هه‌رێما كوردستانێ و هه‌ولێرێ دژیم، د ئێك ژ فلمێن مندا ب ناڤێ «سه‌فه‌ر بۆ نیشتیمانێ بابێ» به‌حسێ هاتنا من بۆ ئه‌وێ پارچا كوردستانێ دكه‌ت یاكو ژیانا من گوهارتى، نێزیكى بیست سالان ل ئیرانێ و ب تایبه‌تى ل باژێرێ ته‌هرانێ وه‌كو رێڤه‌به‌ر و خودان فێرگه‌ها موزیكێ من چالاكییێن موزیكێ دكرن، ل هه‌ولێرێ ژى من خانه‌یا ئه‌كادیمییا ته‌میره‌یا كورد دامه‌زراندییه كو هیڤیدارم بشێم د وارێ موزیكا كوردى دا ل چه‌ند سالێن بهێن روودانێن مه‌زن ل هه‌رێما كوردستانێ تۆمار بكه‌ین.
