كەسێن زیرەك ژ ئاریشەیان ناڕەڤن و چارەسەر دكەن
هەولێر، قائید میرۆ:
ڤەكۆلەرەكێ جڤاكی دیار كر كو، مرۆڤ بەردەوام تووشی ئاریشەیان دبیت د ژیانا خۆدا، بەلێ پێدڤیە ب شارەزایی سەرەدەریێ دگەل وان ئاریشەیان بكەت و گۆت: نابیت مرۆڤ ژ ئاریشان ب ڕەڤیت، بەلكو پێدڤیە بەردەوام بزاڤێ بۆ چارەسەركرنا وان بكەت.
سەردار لەتیف، ڤەكۆلەرێ جڤاكی بۆ رۆژناما ئەڤرۆ دیار كر، هەموو مرۆڤ تووشی ئاریشەیان دبن و كەسەك یێ بێ ئاریشە نینە، چونكە ئەم هەموو مرۆڤین و رۆژانە سەرەدەریا مە دگەل مرۆڤانە، لەوڕا زۆر ئاساییە مرۆڤ تووشی ئاریشان ببیت، بەلێ دڤێت مرۆڤ پێنگاڤێن چارەسەركرنا ئاریشەیان بزانیت هەتا ب كێمترین زیان ژێ دەركەڤیت.
ڤەكۆلەرێ جڤاكی ئەو چەندە ژی دیار كر، ل دەمێ پەیدابوونا ئاریشەیان دو جورێن مرۆڤان هەنە، جورەكێ مرۆڤان هەیە ل دەمێ پەیدابوونا هەر ئاریشەیەكێ ژێ د ڕەڤیت، ئەڤە ژی كارەكێ شاشە، ژبەركو باشترە ئاریشە بهێتە چارەسەر كرن داكو مەزنتر و ئالۆزتر لێ نەهێت، جورەكێ دی یێ مرۆڤان هەیە هەر ئاریشەیەكا بۆ پەیدا دبیت ئەڤێ ئاریشەیێ وەكی خۆ وەردگریت و قەبوول دكەت و پێنگاڤان بۆ چارەسەركرنێ دهاڤێژیت و گۆت: باشترین چارەسەری ژی بۆ ئاریشێ ئەوە مرۆڤ پێشوازیێ لێ بكەت ب دەروونەكێ ئارام، چونكی باشترە ل دەمێ پەیدابوونا ئاریشێ مرۆڤ خۆ ئارام بكەت و دووڤدا بڕیارا چارەسەركرنێ بدەت.
ڤەكۆلەر سەردار دا زانین كو سێ جورێن ئاریشەیان هەنە هندەك ژ وان ب ساناهی دهێنە چارەسەر كرن، هندەكێن دی هەتا رادەیەكی دهێنە چارەسەر كرن و مخابن هندەك ئاریشە هەنە چارەسەر نابن و گۆت: لێ دڤێت مرۆڤ خۆ بگونجینیت دگەل وان ئاریشەیێن نەهێنە چارەسەركرن و پێنگاڤا ئێكێ بۆ چارەسەركرنا هەر ئاریشەیەكێ ئەوە مرۆڤ ئاریشێ دیار بكەت و بزانیت چیە، خالا دویێ مرۆڤ خالێن چارەسەریێ دیار بكەت و هندەك خالا وەك پێشنیاران دانیت بۆ چارەسەركرنا ئاریشەیێ، پشتی هەلبژارتنا باشترین رێك بۆ چارەسەركرنا ئاریشەیێ جێبەجێ بكەت.
سەردار لەتیف، ڤەكۆلەرێ جڤاكی د بەردەوامیا ئاخفتنێن خۆدا دیار كر، پێدڤیە ل دەمێ پەیدابوونا ئاریشەیەكێ و چارەسەركرنێ بۆچوونا كەسێ بسپۆر بهێتە وەرگرتن و گۆت: ئەز یێ پشتڕاستم دێ ئەنجامێن باش هەبن و بەرهەم هەبیت بۆ گەهشتن ب چارەسەریێ، ژیان یا تژی ئاریشەیە، بەلێ هەر ئاریشەكا د ژیانا مرۆڤی دا پەیدا دبیت دڤێت مرۆڤ یێ لسەر زال بیت و ژێ نە ڕەڤیت.
