هه‌موو حه‌زا من ئه‌وه سینه‌ما كوردی پێشبكه‌ڤیت
ئه‌ڤرۆ، زنار تۆڤی:
ده‌رهێنه‌را سینه‌مایی ئه‌ڤین به‌رازی، ل باژێرێ كۆبانێ ژ خێزانه‌كا ره‌وشه‌نبیر و هونه‌ردۆست ل رۆژئاڤایێ كوردستانێ ژ دایك بوویه و نوكه ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دیار كر:
من خواندنا خۆیا سه‌ره‌تایی و ناڤنجی و ئاماده‌یی ل باژێرێ حه‌له‌بێ ته‌مام كریه، پاشی من پشكا ئابووری ل زانكۆیا حه‌له‌بێ ب دووماهی ئینایه، ده‌مێ من ل زانكۆیێ دخواند، من حه‌ز ل سه‌ر كارێن هونه‌ری و سینه‌مایێ هه‌بوو، ئه‌ڤه بوویه ئه‌گه‌ر، كو ل سالا 2006 ێ، ئه‌ز پشكا ده‌رهێنانا سینه‌مایی ل زانكۆیا به‌یروتێ بخوینم و من خواندنا خۆ ب پله‌یا نایاب ب دووماهی ئینا، هه‌روه‌سا ل كه‌نالێن ته‌له‌ڤزیۆنی یێن لوبنان و سوریێ وه‌كو هاریكارا ده‌رهێنه‌ری و ده‌رهێنه‌ر ژی من كاركریه، د هه‌مان ده‌مدا من كارێ ده‌رهێنه‌ریێ بۆ چه‌ندین فلمان و كورته فلمێن دیكیۆمێنتاری و په‌روه‌رده‌یی كریه، ل گه‌ل پرانیا ده‌رهێنه‌رێن سوری یێن ناڤدار من كاركریه.
ناڤهاتیێ گۆت ژی: هه‌ر ژ زارۆكایتا خۆ من حه‌ز ژ فلمێن سینه‌مایی دكر، هه‌موو حه‌زا من ئه‌و بوو سینه‌ما كوردی پێشبكه‌ڤیت، من گه‌له‌ك حه‌ز ژ كارێ ده‌رهێنانێ كریه، خێزانا من ژی گه‌له‌ك حه‌ز ژ به‌رێخۆدانا فلمێن كوردی دكر، مه گه‌له‌ك به‌رێ خۆ ددا فلمێن ده‌رهێنه‌رێ مه‌زنێ كورد، یلماز گۆنای و ئه‌ز ل گه‌ل فلمێن وی دژیام، ل گه‌ل هندێ ژی ل وی ده‌می من پرسیار ژ خۆ دكر، بۆچی فلمێن كوردی دكێمن؟، ئه‌ڤه بوو ئه‌گه‌ره‌كێ مه‌زن و بۆ پشته‌ڤانه‌ك بۆ من، كو ئه‌ز بهێمه دناڤا وارێ ئه‌كته‌ریێ دا و كارێن سینه‌مایی به‌رهه‌م بینم.
ئه‌ڤین هێشتا دبێژیت: یا دیاره، كو كارێ هونه‌ری ب گشتی و سینه‌ما ب تایبه‌تی، د جڤاكێ كوردی دا نه كاره‌كێ ب ساناهییه، ل ده‌ستپێكێ چه‌ندین ئاسته‌نگ هاتینه پێش، به‌لێ وه‌كو كچه‌كا كوردا ئازا و وێره‌ك ئه‌ز یا به‌رده‌وام بووم ل سه‌ر كارێن هونه‌ری و خێزانا من گه‌له‌ك هاریكاریا من كریه د ڤی بیاڤی دا، ژ پێخه‌مه‌ت هه‌موو هیڤیێن من بجه بهێن، هه‌روه‌سا ده‌مێ ئه‌ز ل سوریێ، ژبه‌ركو ناڤێ من (ئه‌ڤین) بوو، كو ناڤه‌كێ كوردییه، من گه‌له‌ك به‌هره و شیان هه‌بوون، به‌لێ ده‌وله‌تا سوری چه‌ندین ئاسته‌نگ و به‌هانه د ئێخستنه ل پێشیا كارێ من، چاڤدێری د ئێخسته ل سه‌ر هه‌موو كارێن من، له‌وما ئه‌ز نه دشیام ب ره‌نگه‌كێ ئازاد هه‌موو كارێن خۆ ئه‌نجام بده‌م، پشتی تێكچوونا ره‌وشا سوریێ، من قه‌ستا ئورۆپا كر و ل ده‌ستپێكێ ئه‌ز هاتمه وه‌لاتێ دانیمارك، پاشی ئه‌ز چوومه وه‌لاتێ ئه‌لمانیا و نوكه ل وی وه‌لاتی دژیم.
وێ ده‌رهێنه‌را سینه‌مایی دیار كر ژی: من وه‌كو ده‌رهێنه‌ر و هاریكارا ده‌رهێنه‌ری، پشكداری د چه‌ندین به‌رهه‌مێن فلم و كورته فلمێن( ئه‌نیمه‌یشن) و به‌رنامێن ته‌له‌ڤزیۆنی و درامایێن سینه‌مایی و ته‌له‌ڤزیۆنان دا كرییه، هه‌روه‌سا من پشكداری ب ده‌هان فیسته‌ڤال و كورته فلم و فلمێن ئه‌نیمه‌یشن دا كرییه‌ن وه‌كو فیسته‌ڤالا بابل یا سینه‌مایی، فیسته‌ڤالا سینه‌مایی یا وه‌لاتێن ئه‌سكه‌نده‌نافی ل فینله‌ندا، فیسته‌ڤالا كۆبانێ بۆ كورته فلمان، فیسته‌ڤالا نێڤده‌وله‌ت یا كورته فلمێن كوردی ل هامبۆرگ، فیسته‌ڤالا كورته فلمان ل كه‌ركووك و سلێمانیێ، دیسان ئه‌ز سه‌رۆكا لژنا ئاماده‌كار یا فیسته‌ڤالا كورته فلمان بووم ل كۆبانێ، به‌رپرسا راگه‌هاندنا ئێكه‌تیا نێڤده‌وله‌تی یا فیسته‌ڤالا سینه‌مایی یا عه‌ره‌بی بوویه، كو ژ 19 ئه‌ندامان پێكدهات و 13 وه‌لاتێن عه‌ره‌بی پشكداری تێدا كربوو، هه‌تا نوكه من چه‌ندین جاران خه‌لاتێ رێزلێنانێ وه‌رگرتیه، ل گه‌ل هندێ ژی سینه‌ما كار و هونه‌ر و پیشه‌سازیه و پێدڤی ب كار و بزاڤێن ب كۆم هه‌یه، نوكه ژی كار ل سه‌ر چێكرنا دو فلمان دكه‌م، ئێك فلمه‌كێ دیكیۆمێنتاری یه و فلمێ دیتر ژی یێ درێژه، ل گه‌ل هندێ ژی ئه‌ز مژوولی ده‌رهێنانا فلمه‌كێ مه ب ناڤێ( گرین لاین)، دیسان ئه‌ز حه‌ز دكه‌م،فلمه‌كێ ل سه‌ر ژنان و گوهۆرینێن ل سه‌رده‌مێ شۆره‌شا سوریێ دروست بكه‌م، ب تایبه‌تی ژی ژنێن باژێرێ كۆبانێ، هه‌ر چه‌نده ئاسته‌نگ
د زۆرن ل پێشیا سینه‌ما كوردی، پشكه‌ك ژ وان ئاریشان دابه‌شبوونا كوردانه ل سه‌ر چه‌ندین وه‌لاتان و ل گه‌ل هندێ به‌ربه‌لاڤبوونا ئه‌كته‌رێن كورده ل وان وه‌لاتان، هه‌روه‌سا نه‌بوونا پشته‌ڤانیێ ژ لایێ كۆمپانیێن به‌رهه‌مئینانێ ڤه، د وارێ به‌رهه‌مئینانا فلمێن سینه‌مایی دا، ئاریشا هه‌ره مه‌زنه ل هه‌مبه‌ر سینه‌مایا كوردی دا.
