فازل میرانی: مام جەلالی شێوازێ (دێ گوهۆڕین و شكێنین و دەركەین) ل گەل پارتی ب كارنەدئینا
بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان راگەهاند: دخوازم سلێمانیێ بزڤریت وەكو باژێرێ جاران، هەروەسا گۆت ژی: ئێك هێزا پێشمەرگەی یا ب ساناهی نینە، ئەستەم ژی نینە.
فازل میرانی، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان د بەرنامەیێ بۆ هەموویان ل كوردستان 24 گۆت» كوردستان پێدڤی كریارایە نەكو گۆتارا، ل ئیراقێ هەر دەمێ شۆڕەشا كوردی یا ب هێز با و ئیراق یا بێ هێز با، دا داگیرانێ كەت، ئیراق وەلاتەكێ ب هێز نینە، بەلێ بەرامبەر مە خوە ب هێز دبینیت چونكە ئەم د ناڤ خوە دا دبێ هێزین».
فازل میرانی گۆت ژی» هاتنا محەمەد شیاع سۆدانی بۆ هەرێما كوردستانێ ئاماژەیەك بوو بۆ وێ چەندێ ب كوردان رابگەهینیت یێ هاتیم هاریكارییا هەوە بكەم، هەڤدەم بۆ وێ چەندێ نیشا توركیا و ئیرانێ بدەت كو مە ل ئیراقێ زمانەكێ هەڤپشك یێ هەی، هەروەسا ب ئیدارەیا ئەمریكی یا نوو ژی بێژیت پەیوەندیێن هەرێما كوردستانێ و بەغدا د باشن».
ل دۆر سیاسەتا دۆنالد ترەمپ سەرۆكێ نوو هەلبژارتی یێ ئەمریكا كو دێ ب فەرمی ل 20/1/2025 دەست بكاربیت، گۆت» یا ب ساناهی نینە شرۆڤەكرن بۆ كاركرنا وی سەرۆكێ نوو یێ ئەمریكا بهێتە كرن، چونكە زەلامكارە، ئەوێن ل بزنسێ كار دكەن راوێژێ ناكەن، بەلكو بڕیارێ ددەن، ل دەف ئەمریكییان وەلاتێ وان بەری هەموو تشتەكییە، سیاسەتا ئەمریكا یا جهگیرە، بەلێ دڤێت ئەمریكا بزاڤەكێ بكەت باوەریێ بدەتە هەڤپەیمانێن خوە».
بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان رۆهنكر ژی» ئەم وەكو پارتی دیموكراتی كوردستان پشتەڤانییا چارەسەركرنا كێشەیا كوردی بووین ل پارچەیێن دی ب شێوەیەكێ ئاشتییانە، مە خوە ژی نەكریە بەدیلێ هیچ حزبەكی ل وان پارچەیان».
سەبارەت دانوستاندنێن پشتی هەلبژارتنێن پەرلەمانێ كوردستانێ، فازل میرانی گۆت» پێدڤییە پێش رۆناهیێ بێخینە سەر پێكئینانا حوكمەتێ، سەرۆكێ هەرێمێ هەلبژێرین، پاشی حوكمەتێ هێدی هێدی دروست بكەین، تشتەك نینە رێگریێ ل دروستبوونا حوكمەتێ بكەت ب مەرجێ وێ چەندێ بەرژەوەندییا وەلاتی و مللەتی ل سەر بەرژەوەندیێن حزبان بیت».
میرانی دیاركر ژی» ئالییەكی دڤێت خەلك وەكو وان هزر بكەت، نابیت ئەوا تە دڤێت، خەلك ب وی شێوەی هزر بكەت، هەكە كوردستان نەبیت ئەم نابین».
فازل میرانی رۆهنكر ژی» مام جەلالی شێوازێ دێ گوهۆڕین و شكێنین و دەركەین ل گەل پارتی ب كارنەدئینا، كوردستان ل دەف مام جەلالی مەبەست بوو، رێبازا مام جەلالی ناهێتە پەیڕەوكرن، ئەو كێشەیەكە ئەم روو ب رووبووینێ، دەستێ دەرەكی كوردستان یا دابەشكری و ئەو دەستە ژی هەر یێ مای».
ل دۆر پشكدارییا پێكهاتەیان د حوكمەتا داهاتییا هەرێما كوردستانێدا، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان گۆت» بلا پرسا ئێكێ و دویێ چارەسەر بكەین، ئەڤجا دێ هێینە سەر كێشەیا پێكهاتەیان، مە ب بڕیارا سەرۆك بارزانی پەیڤا (كەمینەیان) ژ فەرهەنگا خوە یا لادای، رێككەفتنا ئێكەتیێ یان ژی پارتی ل گەل پێكهاتەیان بێی هەڤدو كێشەیێ چارەسەر ناكەت، بەلێ چارەسەركرنا كێشەیا د ناڤبەرا مە و ئێكەتیێ دا، دێ كێشەیا پێكهاتەیان ژی چارەسەركەت».
سەبارەت دەستكەفتێن پارتی دیموكراتی كوردستان د هەلبژارتناندا، فازل میرانی گۆت» هەكە سەختەكاری د هەلبژارتناندا نەهێتە كرن، پێدڤییە ب ئەنجامێن هەلبژارتنان رازی ببی، نابیت بانگەشەیا دیموكراسیێ بكەین، هەرچەندە هەلبژارتن رامانا وێ چەندێ نینە هەر كەسێ هەلبژارتن ئەنجامدا دیموكراسییە، ب دیتنا من ژی هەلبژارتن نەهاتبوو دیزاینكرن، مللەت یێ ل گەل مە هەكە كورسیێن مە ژی كێم ببن».
هەروەسا دیاركر» وەكو پارتی مە 800 هزار دەنگ یێن هەین، هەكە گەل دەنگێن پارێزگەهێن نەینەوا و كەركووكێ و دەڤەرێن مادەیێن 140 بێخینە سەر، دەنگێن پارتی دێ ژ ملیۆن دەنگان دەرباز بن، دبیت ل جڤاتا نوونەرێن ئیراقێ كورسیێن مە زێدە ببن» خویاكر ژی» هەكە هەلبژارتن ئێك بازنەیی با، دبیت پارتی 44 هەتا 45 كورسی ب دەستڤەئینابان».
