سەرۆكێ حوكمەتا هەرێمێ: پێدڤییە ب زووترین دەم، پرۆسەیا هنارتنا پەترۆلێ دەست پێ بكەت
دوهی ئێكشەمبی 17/11/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ جڤاتا بازرگانییا ئەمریكا – كوردستان ( USKBC) كر، كو ژ نوونەرێن هەژمارەكا كۆمپانیێن ئەمریكی پێكهاتبوو.
ب گۆڕەی بەیاننامەیەكا حوكمەتا هەرێما كوردستانێ» ل دەستپێكا كۆمبوونێ، دەیڤد تافوری، سەرۆكێ جڤاتا بازرگانییا ئەمریكا – كوردستان، پیرۆزباهییا سەركەفتنا پڕۆسەیا هەلبژارتنێن خولا شەشێ یا پەرلەمانێ كوردستانێ و ئەنجامێن وێ ل سەرۆكێ حوكمەتا هەرێما كوردستانێ كر، كو ب شێوەیەكێ ئازاد و دیموكراتییانە هاتنە ئەنجامدان، هەروەسا كورتییەك دەربارەی ئارمانجا سەرەدانا خوە بەرچاڤكر».
دەیڤد تافوری ئاماژە ب وێ چەندێ ژی كر» هەرێما كوردستانێ رۆل و پێگەهەكێ گرنگ د ئیراقێ و دەڤەرێدا یێ هەی و ئارمانج ژ سەرەدانا وان بۆ هەرێمێ دیاركرنا پشتەڤانیێ و پێشڤەبرنا پەیوەندیێن ئابووری و بازرگانی و بەرئێنانێیە ل گەل هەرێما كوردستانێ».
ژ ئالیێ خوەڤە، مەسرور بارزانی، سەرۆكێ حوكمەتا هەرێما كوردستانێ، وەكو د بەیاننامەیا حوكمەتا هەرێمێ دا هاتی» سەرەرای ئاماژەدان ب گوهۆڕین و پێشهاتێن ئیراقێ و دەڤەرێ و پەیوەندیێن د ناڤبەرا حوكمەتا هەرێما كوردستانێ و حوكمەتا فیدرالی دا، باس ل چاكسازیێن حوكمەتا هەرێما كوردستانێ كر، ب تایبەتی د وارێن ب دیجیتالكرنا خزمەتگوزارییان و پێشڤەبرنا سیستەمێ بانكی و پڕۆژەیێ (هەژمارا من) و ب ساناهیكرنا كاری بۆ وەبەرئێنەران».
د پشكەكا دی یا كۆمبوونێدا» سەرۆكێ حوكمەتا هەرێما كوردستانێ باس ل گرنگییا دەستپێكرنا هنارتنا پەترۆلا هەرێما كوردستانێ كر، كو راوەستییانا وێ، زیانێن چەندین ملیار دۆلاران گەهاندینە بودجەیا گشتییا ئیراقێ و پێدڤییە د زووترین دەمدا، پڕۆسەیا هنارتنا پەترۆلا هەرێما كوردستانێ بهێتە دەستپێكرن».
