دوپاتیێ ل پێشڤەبرنا هەماهەنگیێ د ناڤبەرا پێشمەرگەی و لەشكرێ ئیراقێ دا بۆ چەسپاندنا ئارامیێ ل دەڤەرێن كوردستانی دكەین
دوهی ئێكشەمبی 17/11/2024، مەسرور بارازنی، سەرۆكێ حوكمەتا هەرێما كوردستانێ، پەیامەكا بەهیداریێ ل دۆر تەقینا خورماتوو و شەهیدبوونا هەژمارەكا پێشمەرگە و سەربازێن لەشكرێ ئیراقێ بەلاڤكر.
سەرۆكێ حوكمەتا هەرێما كوردستانێ د پەیاما خوە یا بەهیداریێدا ئاماژە ب وێ چەندێ كر» سەرەخوەشیێ ل مالبات و كەسوكارێن (عەقید روكن سامان سابر سلێمان فەرماندەیێ فەوجا لیوا ئێك یا هەڤپشك و عەقید محەمەد رزا كەریم ئەفسەرێ ئەندازەیا فیرقا 9 یا زرێپۆشی یا لەشكرێ ئیراقێ و جێگرێ ئەفسەری شەریف ئەحمەد محەمەد ئەمین) دكەم كو ب مخابنی ڤە، ل سنوورێ خورماتوو شەهید بوون».
مەسرور بارزانی د پەیاما خوە دا گۆت ژی» خودایێ مەزن گیانێ وان ب بەحەشتێ شاد بكەت و ئارامیێ ب مالبات و هەڤال و هەڤسەنگەرێن وان ببەخشیت. هەروەسا هیڤییا زوو چاكبوونێ ژی بۆ برینداران دخوازم».
سەرۆكێ حوكمەتا هەرێمێ د پەیاما خوە یا بەهیداریێدا دوپاتی ل گرنگییا پێشڤەبرنا هاریكاریێ و هەماهەنگیێ دناڤبەرا هێزا پێشمەرگەی و لەشكرێ ئیراقێ، بۆ بەرهنگاربوونا گەف و كێشەیێن ئەمنی و چەسپاندنا ئارامی و سەقامگیرییا دەڤەرێن كوردستانێ یێن ژ دەرڤەی ئیدارەیا هەرێما كوردستانێ كر.
