هیڤیدارم كاربدەست مفای ژ بۆچوون و بڕیارێن كۆڕبەندێ مێپس وەربگرن
مەسرور بارزانی، سەرۆكێ حوكمەتا هەرێما كوردستانێ، ل كۆڕبەندێ مێپس ل دهۆكێ، پەیڤا دەستپێكا كۆڕبەندی پێشكێشكر و راگەهاند: یا گرنگە بڕیار و گەنگەشەیێن كۆڕبەندێ مێپس بكەڤنە بەردەستێ بڕیاربدەستێن هەرێما كوردستانێ و ئیراقێ و دەڤەرێ، تاكو مفای ژێ وەربگرن.
دەقێ پەیڤا سەرۆكێ حوكمەتا هەرێما كوردستانێ:
ژ هەر جهەكێ هوون ژێ تاهین ب خێر بهێن، سەربلندین ب بەرهەڤبوونا هەوە ل ڤی كۆڕبەندێ پێنجێ (مێپس) ل زانكۆیا ئەمریكی ل باژێرێ دهۆكا جوان. هیڤیدارم ڤان دو رۆژان كو ئەڤ كۆڕبەندە ل ڤێرێ دهێتە ئەنجامدان. هەموو بۆچوون و ئەو بڕیارێن ل ڤێ كۆڕبەندی دهێنە دروستكرن و گەنگەشە ل سەر دهێتە كرن، بكەڤنە بەردەستێ بڕیاربدەستان ل هەرێما كوردستانێ، ل ئیراقێ، ل دەڤەرێ، مفای ژێ وەربگرن.
ئەڤە جارا پێنجێیە كو ئەڤ كۆڕبەندە ل باژێرێ دهۆكێ ب رێكا زانكۆیا ئەمریكی دهێتە دروستكرن، دەستخوەشیێ ل رێكخەرێن ڤی كۆڕبەندی دكەم، هیڤیدارین سال ب سال بشێین درێژیێ ب ڤی كۆڕبەندی بدەین و باشتر ژی بكەین.
د جهێ خوەدایە ئەز دەستخوەشیێ ل زانكۆیا ئەمریكی ژی بكەم، هەم بۆ رێكخستنا ڤی كۆڕبەندی، هەم بۆ وێ چەندێ ژی كو كێمتر ژ 10 سالان دەستكەفتەكێ نێڤدەولەتی ژی ب دەستڤەبینیت، ئەوژی یا بوویە بەربژار بۆ وێ چەندێ كو (accreditation niche) وەربگریت. نوكە یا بەربژارە و ئەڤە دەستكەفتەكێ مەزنە بۆ ڤێ زانكۆیێ كو نوكە ژیێ وێ تنێ 10 سالن.
هەروەسا د جهێ خوەدایە سوپاسی و دەستخوەشیێ ل خەلكێ كوردستانێ بكەم بۆ ئەنجامدانا هەلبژارتنێن سەركەفتی ل دەڤەرا رۆژهەلاتا ناڤین كو ب چەندین كێشە و گرفتان دەرباز دبیت، هیڤیدارم ئەنجامێن ڤی كۆڕبەندی د خزمەتا هەموو خەلكێ ئیراقێدا بن و ئەم ژی بشێین مفای ژێ وەربگرین.
